എസ്‌ഐആർ (SIR) വോട്ടർപട്ടിക പരിഷ്കരണത്തിലെ ക്രമക്കേടുകൾ ആരോപിച്ച് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ രൂക്ഷ വിമർശനവുമായി ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. ഗ്യാനേഷ് കുമാർ സ്ഥാനത്തുനിന്ന് പുറത്താകുമെന്നും ജയിലിലാകുമെന്നും അദ്ദേഹം പറഞ്ഞു. ഡൽഹിയിലെ രാംലീല മൈതാനത്ത് ഇന്ത്യാ സഖ്യം സംഘടിപ്പിച്ച ‘ചലോ ഡൽഹി’ റാലിയിൽ സംസാരിക്കുകയായിരുന്നു അദ്ദേഹം.
വോട്ടുമോഷണം രാജ്യത്തെ ജനങ്ങളുടെ ശബ്ദം കവർന്നെടുക്കുന്നതിന് തുല്യമാണെന്നും ഇത് രാജ്യദ്രോഹമാണെന്നും രാഹുൽ ആരോപിച്ചു. 2024ലെ ലോക്‌സഭാ തിരഞ്ഞെടുപ്പിലും ഇവിഎമ്മുകൾ വഴിയും വോട്ടർപട്ടികയിൽ കൃത്രിമം നടത്തിയും വോട്ടുകൾ മോഷ്ടിക്കപ്പെട്ടുവെന്നാണ് അദ്ദേഹത്തിൻ്റെ ആരോപണം. തിരഞ്ഞെടുപ്പിനുശേഷം 15 ശതമാനം വോട്ടർമാരെ ഒഴിവാക്കിയെന്നും ഇന്ത്യാ സഖ്യവും എൻഡിഎയും തമ്മിലുള്ള വോട്ട് വ്യത്യാസം മൂന്ന് ശതമാനം മാത്രമായിരുന്നുവെന്നും അദ്ദേഹം ചൂണ്ടിക്കാട്ടി.
ആർഎസ്എസ് രാജ്യത്തെ വിവിധ സ്ഥാപനങ്ങളെ നിയന്ത്രിക്കുകയാണെന്നും ജനാധിപത്യവും ഭരണഘടനയും സംരക്ഷിക്കാൻ പ്രതിപക്ഷം പോരാട്ടം തുടരുമെന്നും രാഹുൽ വ്യക്തമാക്കി. എത്ര അധികാരവും സമ്പത്തുമുണ്ടെങ്കിലും ഭരണഘടനയേക്കാൾ വലുതല്ലെന്നും അദ്ദേഹം പറഞ്ഞു.
ഗ്യാനേഷ് കുമാറിൻ്റെ രാജി ആവശ്യപ്പെട്ട് സംഘടിപ്പിച്ച റാലിയിൽ സോണിയ ഗാന്ധി, രാഹുൽ ഗാന്ധി, അഖിലേഷ് യാദവ്, മമത ബാനർജി, തേജസ്വി യാദവ് തുടങ്ങിയ പ്രമുഖ പ്രതിപക്ഷ നേതാക്കളും വിവിധ പാർട്ടികളുടെ പ്രവർത്തകരും പങ്കെടുത്തു. തിരഞ്ഞെടുപ്പ് കമ്മീഷനെതിരായ ആരോപണങ്ങൾ കമ്മീഷനും ബിജെപിയും നിഷേധിച്ചിട്ടുണ്ട്.
