ബെംഗളൂരു–മുംബൈ റൂട്ടിൽ പുതിയ വന്ദേ ഭാരത് സ്ലീപ്പർ ട്രെയിൻ സർവീസിന് ദക്ഷിണ പശ്ചിമ റെയിൽവേ (SWR) രണ്ട് ട്രെയിൻസെറ്റുകൾ സജ്ജമാക്കി. ബെംഗളൂരുവിൽ ബി.ഇ.എം.എൽ നിർമിച്ച 16 കോച്ചുകളുള്ള രണ്ട് റേക്കുകളാണ് SWR-ന് ലഭിച്ചത്. വിശദമായ പരിശോധനകളും പരീക്ഷണ ഓട്ടങ്ങളും പൂർത്തിയാക്കിയ ശേഷമാണ് ട്രെയിൻസെറ്റുകൾ സർവീസിനായി കമ്മീഷൻ ചെയ്തത്.
സർവീസ് ആരംഭിക്കുന്നതിനുള്ള ഒരുക്കങ്ങൾ പുരോഗമിക്കുകയാണെന്നും സമയക്രമം ഉടൻ പ്രഖ്യാപിക്കുമെന്നും ബെംഗളൂരു ഡിവിഷണൽ റെയിൽവേ മാനേജർ അശുതോഷ് കുമാർ സിങ് അറിയിച്ചു. അംഗീകരിച്ച റൂട്ടിൽ ഉടൻ പരീക്ഷണ ഓട്ടം നടത്തും. യാത്രാസമയം വിലയിരുത്തുന്നതിനും ആർ.ഡി.എസ്.ഒയുടെ വേഗപരിശോധനകൾ നടത്തുന്നതിനുമാണ് ട്രയൽ റൺ.
ട്രെയിൻ കെ.എസ്.ആർ ബെംഗളൂരു–സി.എസ്.എം.ടി മുംബൈ റൂട്ടിൽ സർവീസ് നടത്താനാണ് നിലവിലെ സാധ്യത. എന്നാൽ സർവീസ് എസ്.എം.വി.ടി ബെംഗളൂരുവിൽ നിന്ന് ആരംഭിക്കുന്നതിനുള്ള സാധ്യതയും റെയിൽവേ പരിഗണിക്കുന്നുണ്ട്. ഇരു സാധ്യതകളും പരിശോധിച്ചുവരികയാണെന്ന് അധികൃതർ അറിയിച്ചു.
ട്രെയിനിൻ്റെ പ്രധാന അറ്റകുറ്റപ്പണികൾ കെ.എസ്.ആർ ബെംഗളൂരുവിലോ എസ്.എം.വി.ടി ബെംഗളൂരുവിലോ നടത്തും.
ബെംഗളൂരുവിൽ നിന്നും മുംബൈയിൽ നിന്നും രാത്രിയാകും ട്രെയിൻ പുറപ്പെടുക. ഏകദേശം 16 മണിക്കൂറിനുള്ളിൽ യാത്ര പൂർത്തിയാക്കാനാണ് ലക്ഷ്യം. നിലവിൽ ഈ റൂട്ടിൽ സർവീസ് നടത്തുന്ന പ്രധാന ട്രെയിനുകൾക്ക് ഏകദേശം 24 മണിക്കൂർ വരെ യാത്രാസമയം വേണ്ടിവരുന്നതിനാൽ പുതിയ സർവീസ് യാത്രക്കാർക്ക് വലിയ ആശ്വാസമാകുമെന്നാണ് പ്രതീക്ഷ.
വിമാനയാത്രയെക്കാൾ നിരക്ക് കുറവായിരിക്കുമെന്നും അധികൃതർ വ്യക്തമാക്കി. 3AC ടിക്കറ്റ് നിരക്ക് ഭക്ഷണം ഉൾപ്പെടെ ഏകദേശം 3,000 രൂപയായിരിക്കുമെന്നാണ് പ്രതീക്ഷിക്കുന്നത്. പുതിയ വന്ദേ ഭാരത് സ്ലീപ്പറിൽ 11 കോച്ചുകൾ – 3AC, 4 കോച്ചുകൾ – 2AC, 1 കോച്ച് – 1AC എന്നിങ്ങനെ ആകെ 16 കോച്ചുകളാണുള്ളത്.
കല്യാണ കർണാടക മേഖലയിലൂടെ സർവീസ് നടത്തുന്നതിനാൽ റായ്ച്ചൂർ, യാദ്ഗിർ, കലബുറഗി തുടങ്ങിയ ജില്ലകളിലേക്കുള്ള യാത്രക്കാർക്കും പുതിയ ട്രെയിൻ പ്രയോജനപ്പെടും. ഏകദേശം 1,137 കിലോമീറ്റർ ദൂരമുള്ള ഈ റൂട്ട് പൂർണമായും വൈദ്യുതീകരിച്ചതും ഇരട്ടപ്പാതയാക്കിയതുമാണ്. ഭൂരിഭാഗം ഭാഗങ്ങളിലും മണിക്കൂറിൽ 130 കിലോമീറ്റർ വരെ വേഗതയിൽ ട്രെയിൻ ഓടിക്കാനാകുമെന്നാണ് റെയിൽവേ വ്യക്തമാക്കുന്നത്.
ഹുബ്ബള്ളി വഴി സർവീസ് നടത്തണമെന്ന ആവശ്യം ഉയർന്നിരുന്നെങ്കിലും കൂടുതൽ ദൂരം, ചില ഭാഗങ്ങളിലെ ഒറ്റപ്പാത, വേഗപരിധി തുടങ്ങിയ കാരണങ്ങളാൽ ആ റൂട്ട് പരിഗണിച്ചിട്ടില്ല.
