പശ്ചിമ ബംഗാളിൽ ഡെങ്കിപ്പനി കേസുകളിൽ വൻ വർധന. ഈ വർഷം ഇതുവരെ റിപ്പോർട്ട് ചെയ്ത ഡെങ്കിപ്പനി കേസുകളുടെ എണ്ണം 5,000 കടന്നു. ആരോഗ്യവകുപ്പിൻ്റെ ഏറ്റവും പുതിയ കണക്കുകൾ പ്രകാരം സെപ്റ്റംബർ 11 വരെ 5,002 കേസുകളാണ് സംസ്ഥാനത്ത് റിപ്പോർട്ട് ചെയ്തത്.
ഓഗസ്റ്റ് അവസാനം വരെ 2,500ൽ താഴെയായിരുന്നു കേസുകൾ. അതായത് ഒരു മാസത്തിനിടെ മാത്രം 2,500ലധികം പുതിയ കേസുകൾ റിപ്പോർട്ട് ചെയ്തു. മുർഷിദാബാദിലാണ് ഏറ്റവും കൂടുതൽ കേസുകൾ. കൊൽക്കത്തയും വടക്കൻ 24 പർഗാനാസുകളുമാണ് തൊട്ടുപിന്നിൽ.
സംസ്ഥാനത്തെ 29 നഗരസഭകൾ, 85 കമ്മ്യൂണിറ്റി ഡെവലപ്മെന്റ് ബ്ലോക്കുകൾ, 278 ഗ്രാമപഞ്ചായത്തുകൾ എന്നിവ ഡെങ്കിപ്പനി ബാധിത പ്രദേശങ്ങളായി കണ്ടെത്തിയിട്ടുണ്ട്. ഈ മേഖലകളിൽ പരിശോധനയും നിരീക്ഷണവും ആരോഗ്യവകുപ്പ് ശക്തമാക്കി.
മൺസൂൺ കാലാവസ്ഥ ഈഡിസ് കൊതുകുകൾ പെരുകാൻ അനുകൂലമായ സാഹചര്യങ്ങൾ സൃഷ്ടിച്ചതാണ് കേസുകൾ ഉയരാനുള്ള പ്രധാന കാരണങ്ങളിലൊന്ന്. ഡെങ്കിപ്പനിയുടെ ലക്ഷണങ്ങൾ നേരത്തെ തിരിച്ചറിയുകയും സ്വയം ചികിത്സ ഒഴിവാക്കുകയും വീടുകൾക്കും പരിസരങ്ങൾക്കും ചുറ്റും കൊതുകുകൾ പെരുകുന്നത് തടയുകയും ചെയ്യണമെന്ന് ഡോക്ടർമാർ മുന്നറിയിപ്പ് നൽകി.
