പ്രതിമാസ ഓണറേറിയം 15,000 രൂപയായി വർധിപ്പിക്കണമെന്നതടക്കമുള്ള ആവശ്യങ്ങൾ ഉന്നയിച്ച് ബെംഗളൂരുവിലെ ഫ്രീഡം പാർക്കിൽ സമരം നടത്തുന്ന ആശാ പ്രവർത്തകരും മുഖ്യമന്ത്രി ഡി.കെ. ശിവകുമാറും തമ്മിൽ നടത്തിയ ചർച്ച പരാജയപ്പെട്ടു. ആവശ്യങ്ങളിൽ വ്യക്തമായ ഉറപ്പ് ലഭിക്കാത്തതിനെ തുടർന്ന് രാപ്പകൽ സമരം തുടരാൻ കർണാടക രാജ്യ സംയുക്ത ആശാ പ്രവർത്തക സംഘടന തീരുമാനിച്ചു.
വ്യാഴാഴ്ച മുഖ്യമന്ത്രിയുടെ ഔദ്യോഗിക വസതിയായ കൃഷ്ണയിൽ നടന്ന കൂടിക്കാഴ്ചയിൽ ആശാ പ്രവർത്തക സംഘടനയുടെ സംസ്ഥാന പ്രസിഡണ്ട് കെ. സോമശേഖര യാദഗിരി, സെക്രട്ടറി ഡി. നാഗലക്ഷ്മി തുടങ്ങിയവർ പങ്കെടുത്തു. ആരോഗ്യ മന്ത്രി യു.ടി. ഖാദറും ചർച്ചയിൽ സന്നിഹിതനായിരുന്നു. എട്ടോളം ആവശ്യങ്ങൾ അടങ്ങിയ നിവേദനം മുഖ്യമന്ത്രിക്ക് കൈമാറി.
നിലവിൽ സംസ്ഥാന സർക്കാർ നൽകുന്ന 5,000 രൂപയുടെ പ്രതിമാസ ഓണറേറിയം 15,000 രൂപയായി ഉയർത്തണമെന്നാണ് പ്രധാന ആവശ്യം. കുടിശ്ശികയായ ഇൻസെന്റീവുകൾ ഉടൻ വിതരണം ചെയ്യുക, വിരമിക്കുമ്പോൾ 15 ലക്ഷം രൂപയുടെ ആനുകൂല്യം അനുവദിക്കുക, മതിയായ ഉപകരണങ്ങളും സഹായവും നൽകാതെ നിർബന്ധിതമാക്കുന്ന ആപ്പ് അധിഷ്ഠിത ജോലികൾ അവസാനിപ്പിക്കുക തുടങ്ങിയ ആവശ്യങ്ങളും പ്രവർത്തകർ ഉന്നയിക്കുന്നുണ്ട്.
നിലവിൽ സംസ്ഥാന സർക്കാർ നൽകുന്ന 5,000 രൂപയ്ക്കൊപ്പം കേന്ദ്ര വിഹിതമായ 2,000 രൂപയും സംസ്ഥാനത്തിന്റെ അധിക ഇൻസെന്റീവായ 1,000 രൂപയും ഉൾപ്പെടെ ഏകദേശം 8,000 രൂപയാണ് ലഭിക്കുന്നതെന്ന് മുഖ്യമന്ത്രി വിശദീകരിച്ചു. പ്രതിമാസം 15,000 രൂപ നൽകണമെന്ന ആവശ്യം സാമ്പത്തിക ബാധ്യതകൾ കൂടി പരിഗണിച്ച് ധനവകുപ്പുമായും മന്ത്രിസഭയുമായും ചർച്ച ചെയ്ത് നിയമസഭയുടെ അടുത്ത ശീതകാല സമ്മേളനത്തിന് മുമ്പ് തീരുമാനമെടുക്കുമെന്നും അദ്ദേഹം അറിയിച്ചു. സമരം അവസാനിപ്പിച്ച് വീടുകളിലേക്ക് മടങ്ങണമെന്നും മുഖ്യമന്ത്രി അഭ്യർഥിച്ചു.
എന്നാൽ, മുൻപ് നൽകിയ ഉറപ്പുകൾ പാലിക്കപ്പെടാത്ത സാഹചര്യത്തിൽ ഇത്തവണ രേഖാമൂലമുള്ള സർക്കാർ ഉത്തരവ് ലഭിക്കാതെ സമരം അവസാനിപ്പിക്കില്ലെന്നാണ് പ്രവർത്തകരുടെ നിലപാട്. 2025 ജനുവരിയിൽ മുൻ മുഖ്യമന്ത്രി സിദ്ധരാമയ്യ പ്രതിമാസ ഓണറേറിയം 10,000 രൂപയായി ഉയർത്തുമെന്ന് പ്രഖ്യാപിച്ചിരുന്നെങ്കിലും വാഗ്ദാനം പൂർണമായി നടപ്പായില്ലെന്നും സംഘടന ആരോപിച്ചു.
കർണാടകയിലെ ഏകദേശം 41,000 ആശാ പ്രവർത്തകരാണ് സമരത്തിൽ പങ്കെടുക്കുന്നത്. നവംബർ 17-ന് ആരംഭിച്ച അനിശ്ചിതകാല സമരം ഫ്രീഡം പാർക്കിൽ രാപ്പകൽ തുടരുകയാണ്. മാതൃ-ശിശു ആരോഗ്യം, പ്രതിരോധ കുത്തിവയ്പ്പ്, ക്ഷയരോഗം, ഡെങ്കിപ്പനി തുടങ്ങിയ രോഗപ്രതിരോധ പ്രവർത്തനങ്ങൾ ഉൾപ്പെടെ പൊതുജനാരോഗ്യ മേഖലയിൽ നിർണായക സേവനങ്ങൾ നൽകുന്നവരാണ് ആശാ പ്രവർത്തകർ. ആവശ്യങ്ങൾ അംഗീകരിക്കുന്നതുവരെ സമരം ശക്തമായി തുടരാനാണ് സംഘടനയുടെ തീരുമാനം.