‘അമ്മ’ സംഘടനയിലെ വിവാദങ്ങൾക്കിടെ നടൻ ടിനി ടോമിനെതിരായ പരാതിയിൽ നടി അൻസിബയുമായി അഡ്ഹോക്ക് കമ്മിറ്റി നടത്തിയ അനുരഞ്ജന ശ്രമം ഫലം കണ്ടില്ല. ടിനി ടോം പരസ്യമായി മാപ്പ് പറഞ്ഞാൽ മാത്രമേ പരാതി പിൻവലിക്കൂവെന്ന് അൻസിബ വ്യക്തമാക്കി.
അഡ്ഹോക്ക് കമ്മിറ്റി കൺവീനർ രമേഷ് പിഷാരടി വിഷയം കോടതിക്ക് പുറത്തുതന്നെ ഒത്തുതീർക്കാനും പരാതി പിൻവലിക്കാനും ആവശ്യപ്പെട്ടെങ്കിലും അൻസിബ നിലപാട് മാറ്റാൻ തയ്യാറായില്ല. എഴുതി മാപ്പ് നൽകണമെന്ന ടിനി ടോമിൻ്റെ നിർദേശവും അവർ തള്ളി.
ഇതിനിടെ, ‘അമ്മ’യിൽ നിന്ന് രാജിവെച്ച ശ്വേതാ മേനോൻ, മല്ലിക സുകുമാരൻ എന്നിവരെ സംഘടനയിലേക്ക് തിരികെ എത്തിക്കാനുള്ള ശ്രമങ്ങളും അഡ്ഹോക്ക് കമ്മിറ്റി തുടരുകയാണ്.
ഭരണസമിതി രാജിവെച്ചതിനെ തുടർന്ന് സംഘടനയുടെ താൽക്കാലിക ചുമതല വഹിക്കാൻ രൂപീകരിച്ച അഡ്ഹോക്ക് കമ്മിറ്റിയുടെ യോഗം കഴിഞ്ഞ ദിവസമാണ് ചേർന്നത്. നാല് മാസത്തിനകം സ്ഥിരം ഭരണസമിതിയിലേക്ക് തിരഞ്ഞെടുപ്പ് നടത്തുമെന്നും രമേഷ് പിഷാരടി അറിയിച്ചു. സ്ഥിരം കമ്മിറ്റിയിൽ താൻ ഭാരവാഹിയാകില്ലെന്നും അദ്ദേഹം വ്യക്തമാക്കി.
ജനറൽ ബോഡി യോഗത്തിന് പിന്നാലെ ഉണ്ടായ വിവാദങ്ങളും ഭരണസമിതിയുടെ കൂട്ടരാജിയും ‘അമ്മ’യിൽ പ്രതിസന്ധിക്ക് വഴിവെച്ചിരുന്നു. തുടർന്ന് ലക്ഷ്മിപ്രിയ, മല്ലിക സുകുമാരൻ, ആശ അരവിന്ദ് എന്നിവർ രാജിവെച്ചതോടെ സംഘടനയിലെ ഭിന്നത കൂടുതൽ രൂക്ഷമായി.
