കേരളത്തിലെ ഐടി ഹബ്ബായ ടെക്നോപാർക്കിന്‍റെ പ്രവർത്തനങ്ങളെയും പാചകവാതക പ്രതിസന്ധി ബാധിക്കുന്നു. ക്യാമ്പസിനുള്ളിലെ റസ്റ്റോറന്‍റുകളും ഫുഡ് കോർട്ടുകളും പ്രവർത്തനം നിർത്തിയതോടെ ജീവനക്കാർക്ക് ‘വർക്ക് ഫ്രം ഹോം’ അനുവദിക്കുന്നതിനെക്കുറിച്ച് കമ്പനികൾ ആലോചിച്ചു തുടങ്ങി.
ഒരാഴ്ചയായി വാണിജ്യാവശ്യത്തിനുള്ള സിലിണ്ടറുകളുടെ വിതരണം തടസപ്പെട്ടതോടെ ടെക്നോ പാർക്കിനുള്ളിലെ ഭൂരിഭാഗം കഫറ്റീരിയകളും അടച്ചുപൂട്ടി. പരിമിതമായ മെനു മാത്രമാണ് നിലവിൽ പ്രവർത്തിക്കുന്നവ നൽകുന്നത്. ആയിരക്കണക്കിന് ഐടി ജീവനക്കാരെ ഇത് ബാധിച്ചു.
അടുത്തയാഴ്ച മുതൽ ടെക്നോപാർക്കിലെ പ്രമുഖ കമ്പനിയായ യുഎസ്ടി ഗ്ലോബൽ തങ്ങളുടെ ആറായിരത്തോളം വരുന്ന ജീവനക്കാർക്ക് വർക്ക് ഫ്രം ഹോം നൽകാൻ തീരുമാനിച്ചതായി റിപ്പോർട്ട്. സമാനമായ തീരുമാനത്തിലാണ് മറ്റ് കമ്പനികളും. ഹോസ്റ്റലുകളിലും പിജികളിലും പാചകവാതകം തീർന്നതോടെ താമസക്കാർക്ക് ഭക്ഷണം നൽകാൻ കഴിയാത്ത സ്ഥിതിയാണ്.
പല ഉടമകളും താമസിക്കുന്നവരോട് താത്‌കാലം വീടുകളിലേക്ക് മടങ്ങാൻ ആവശ്യപ്പെട്ടിട്ടുണ്ട്. ചില റസ്റ്റോറന്‍റുകൾ സാഹചര്യം മുതലെടുത്ത് ഭക്ഷണത്തിന് അമിതവില ഈടാക്കുന്നതായി ഐടി ജീവനക്കാരുടെ സംഘടനയായ ‘പ്രതിധ്വനി’ ആരോപിച്ചു. സിലിണ്ടറുകളുടെ വിതരണം പുനഃസ്ഥാപിക്കാൻ സർക്കാർ അടിയന്തരമായി ഇടപെടണമെന്ന് സംഘടന ആവശ്യപ്പെട്ടിട്ടുണ്ട്
