ദീപാവലി ആഘോഷങ്ങൾക്ക് മുന്നോടിയായി രാജ്യതലസ്ഥാനത്ത് വായുമലിനീകരണം വീണ്ടും രൂക്ഷമാകുന്നു. ശനിയാഴ്ച രാവിലെ ഡൽഹിയിലെ വായു ഗുണനിലവാര സൂചിക (എക്യുഐ) 364 രേഖപ്പെടുത്തി. ‘വളരെ മോശം’ വിഭാഗത്തിലാണ് വായുനിലവാരം. ചില പ്രദേശങ്ങളിൽ മലിനീകരണ തോത് 400 കടന്ന് ഗുരുതര വിഭാഗത്തിലെത്തി.
നഗരത്തിൻ്റെ വിവിധ ഭാഗങ്ങളിൽ കനത്ത പുകമഞ്ഞ് അനുഭവപ്പെടുന്നുണ്ട്. അന്തരീക്ഷത്തിലെ പൊടിപടലങ്ങളും സൂക്ഷ്മകണങ്ങളും വർധിച്ചതോടെ ശ്വാസതടസ്സം, കണ്ണിന് അസ്വസ്ഥത തുടങ്ങിയ പ്രശ്നങ്ങളും റിപ്പോർട്ട് ചെയ്യപ്പെടുന്നു. ഐഐടി ഡൽഹി മേഖലയിൽ എക്യുഐ 443 വരെയും പഞ്ചാബി ബാഗിൽ 433 വരെയും രേഖപ്പെടുത്തി.
മലിനീകരണം നിയന്ത്രിക്കുന്നതിൻ്റെ ഭാഗമായി ഡൽഹി-എൻസിആർ മേഖലയിൽ ഗ്രേഡഡ് റെസ്പോൺസ് ആക്ഷൻ പ്ലാനിൻ്റെ(ഗ്രാപ്) മൂന്നാംഘട്ട നിയന്ത്രണങ്ങൾ ഏർപ്പെടുത്തിയിട്ടുണ്ട്. ഇതനുസരിച്ച് പൊടിപടലങ്ങൾ സൃഷ്ടിക്കുന്ന നിർമാണ പ്രവർത്തനങ്ങൾക്കും പൊളിച്ചുനീക്കൽ ജോലികൾക്കും നിയന്ത്രണമുണ്ട്. പഴയ മലിനീകരണ നിയന്ത്രണ മാനദണ്ഡങ്ങളിലുള്ള ചില വാഹനങ്ങളുടെ സഞ്ചാരത്തിനും വിലക്കേർപ്പെടുത്തിയിട്ടുണ്ട്. അഞ്ചാം ക്ലാസ് വരെയുള്ള വിദ്യാർഥികൾക്ക് ഹൈബ്രിഡ് പഠനരീതിയും നടപ്പാക്കാം.
ദീപാവലി ദിനത്തിൽ പടക്കങ്ങൾ പൊട്ടിക്കുന്നതും വാഹനങ്ങളുടെ തിരക്ക് വർധിക്കുന്നതും മലിനീകരണം കൂടുതൽ രൂക്ഷമാക്കുമെന്ന ആശങ്കയുണ്ട്. നവംബർ 7 മുതൽ 9 വരെ വായുനിലവാരം ഗുരുതര വിഭാഗത്തിലേക്ക് കടക്കാൻ സാധ്യതയുണ്ടെന്നാണ് കാലാവസ്ഥാ-വായുനിലവാര മുന്നറിയിപ്പ് സംവിധാനത്തിൻ്റെ പ്രവചനം. ഇന്നും നാളെയും ദീപാവലി ആഘോഷങ്ങളുടെ ഭാഗമായി രണ്ട് മണിക്കൂർ നേരത്തേക്ക് പടക്കം പൊട്ടിക്കാൻ അനുമതി നൽകിയിട്ടുണ്ട്.
നഗരവാസികൾ അനാവശ്യമായ പുറംയാത്രകൾ ഒഴിവാക്കണമെന്നും പൊതുഗതാഗതം പ്രയോജനപ്പെടുത്തണമെന്നും അധികൃതർ നിർദേശിക്കുന്നു. കുട്ടികൾ, പ്രായമായവർ, ശ്വാസകോശ സംബന്ധമായ അസുഖങ്ങളുള്ളവർ എന്നിവർ പ്രത്യേക ജാഗ്രത പാലിക്കേണ്ടതുണ്ട്.
