അമേരിക്കൻ പ്രസിഡണ്ട് ഡോണൾഡ് ട്രംപിൻ്റെ മരുമകനും പ്രമുഖ വ്യവസായിയുമായ മൈക്കിൾ ബൂലോസ് എട്ടംഗ സംഘത്തോടൊപ്പം ആലപ്പുഴയിലെത്തി. സ്വകാര്യ സന്ദർശനത്തിൻ്റെ ഭാഗമായാണ് സംഘം കേരളത്തിലെത്തിയത്.
രാവിലെ ചാർട്ടേഡ് വിമാനത്തിൽ കൊച്ചിയിലെത്തിയ ശേഷമാണ് സംഘം ആലപ്പുഴയിലേക്ക് തിരിച്ചത്. അമേരിക്കൻ കോൺസുലേറ്റിലെ ഉദ്യോഗസ്ഥരും സംഘത്തെ അനുഗമിക്കുന്നുണ്ട്. ആലപ്പുഴയിലെ കായൽ സൗന്ദര്യം ആസ്വദിക്കുന്നതിനൊപ്പം ഹൗസ്‌ബോട്ട് യാത്രയും സംഘം നടത്തി.
വൈകുന്നേരം നെഹ്‌റു ട്രോഫി വള്ളംകളിക്കായി പരിശീലനം നടത്തുന്ന ചുണ്ടൻ വള്ളങ്ങളുടെ തുഴച്ചിൽ കാണാനും സംഘത്തിന് പദ്ധതിയുണ്ട്. തുടർന്ന് ആലപ്പുഴയിലെ പ്രമുഖ വിനോദസഞ്ചാര കേന്ദ്രങ്ങൾ സന്ദർശിച്ച ശേഷം വൈകുന്നേരത്തോടെ മടങ്ങുമെന്നാണ് വിവരം.
ട്രംപിൻ്റെ മകൾ ടിഫാനി ട്രംപിൻ്റെ ജീവിതപങ്കാളിയാണ് മൈക്കിൾ ബൂലോസ്. കൊച്ചിയിൽ എത്തിയ സംഘം മുഖ്യമന്ത്രി വി.ഡി. സതീശനുമായി കൂടിക്കാഴ്ച നടത്തിയതായും വിവരമുണ്ട്. സുരക്ഷാ കാരണങ്ങളാൽ സന്ദർശന വിവരം അധികൃതർ നേരത്തെ പുറത്തുവിട്ടിരുന്നില്ല.
