മുഖ്യമന്ത്രി ഡി.കെ. ശിവകുമാറിൻ്റെ ഡൽഹി സന്ദർശനത്തിന് പിന്നാലെ കർണാടക മന്ത്രിസഭാ വികസന ചർച്ചകൾ വീണ്ടും സജീവമായി. മന്ത്രിസഭയുടെ രണ്ടാംഘട്ട വികസനം ഉടൻ നടക്കുമെന്ന സൂചനകൾ ശക്തമായിരിക്കെ, 20ഓളം മന്ത്രിമാരുടെ സാധ്യതാപട്ടിക കോൺഗ്രസ് ഹൈക്കമാൻഡുമായി ചർച്ച ചെയ്യുമെന്ന അഭ്യൂഹങ്ങളും രാഷ്ട്രീയവൃത്തങ്ങളിൽ പ്രചരിക്കുകയാണ്.
അതേസമയം, വിവിധ വികസന പദ്ധതികളും സംസ്ഥാനവുമായി ബന്ധപ്പെട്ട വിഷയങ്ങളും കേന്ദ്രമന്ത്രിമാരുമായി ചർച്ച ചെയ്യുന്നതിനായാണ് ഡൽഹിയിലേക്കുള്ള യാത്രയെന്നാണ് മുഖ്യമന്ത്രിയുടെ ഓഫീസ് ഔദ്യോഗികമായി അറിയിച്ചത്. മടക്കയാത്രയുടെ തീയതി ഇതുവരെ നിശ്ചയിച്ചിട്ടില്ല.
നിലവിൽ ഡി.കെ. ശിവകുമാർ ഉൾപ്പെടെ 14 അംഗങ്ങളാണ് ആദ്യഘട്ട മന്ത്രിസഭയിലുള്ളത്. രണ്ടാംഘട്ട വികസനത്തെക്കുറിച്ചുള്ള ഔദ്യോഗിക പ്രഖ്യാപനത്തിനായി ഭരണ-രാഷ്ട്രീയ കേന്ദ്രങ്ങൾ കാത്തിരിക്കുകയാണ്.
