സ്ത്രീകൾക്കായുള്ള കെഎസ്ആർടിസിയുടെ സൗജന്യ യാത്രാ പദ്ധതിയായ പ്രിയദർശിനിക്കെതിരെ സ്വകാര്യ ബസുടമകൾ ഉന്നയിച്ച പരാതികൾ പരിശോധിക്കാൻ സർക്കാർ പ്രത്യേക സമിതിയെ നിയോഗിക്കാൻ തീരുമാനിച്ചു. പദ്ധതി നടപ്പാക്കിയതോടെ സ്വകാര്യ ബസ് മേഖലയ്ക്ക് വലിയ സാമ്പത്തിക പ്രതിസന്ധി നേരിടേണ്ടിവരുന്നുവെന്നാണ് ബസുടമകളുടെ പ്രധാന പരാതി.
ഗതാഗതമന്ത്രി സി.പി. ജോൺ മുഖ്യമന്ത്രിയുമായി നടത്തിയ ചർച്ചയ്ക്ക് പിന്നാലെയാണ് ഈ വിഷയത്തിൽ പ്രത്യേക സമിതി രൂപീകരിക്കാൻ ധാരണയായത്. കെഎസ്ആർടിസി ഓർഡിനറി ബസുകളിൽ സ്ത്രീകൾക്ക് സൗജന്യ യാത്ര അനുവദിച്ചതോടെ യാത്രക്കാരുടെ എണ്ണം സ്വകാര്യ ബസുകളിൽ ഗണ്യമായി കുറഞ്ഞുവെന്നാണ് ബസുടമകൾ പറയുന്നത്.
സംസ്ഥാനത്തുടനീളം സർവീസ് നടത്തുന്ന ഏകദേശം 8,000 സ്വകാര്യ ബസുകളുടെയും 30,000-ത്തിലധികം ജീവനക്കാരുടെയും ഉപജീവനത്തെ പദ്ധതി പ്രതികൂലമായി ബാധിച്ചുവെന്നാണ് സംഘടനകളുടെ വിലയിരുത്തൽ. പ്രതിദിനം 6,000 മുതൽ 7,000 രൂപ വരെ ലഭിച്ചിരുന്ന കളക്ഷൻ പല റൂട്ടുകളിലും പകുതിയോളം കുറഞ്ഞതായി ബസുടമകൾ ചൂണ്ടിക്കാട്ടുന്നു.
സ്വകാര്യ ബസ് മേഖല ഗുരുതര പ്രതിസന്ധിയിലാണെന്നും, മേഖലയെ സംരക്ഷിക്കാൻ സർക്കാർ അടിയന്തര ഇടപെടൽ നടത്തണമെന്നും ബസുടമകൾ ആവശ്യപ്പെട്ടിരുന്നു. ഈ സാഹചര്യത്തിലാണ് പരാതികൾ വിശദമായി പരിശോധിച്ച് പ്രായോഗിക നിർദേശങ്ങൾ സമർപ്പിക്കാൻ പ്രത്യേക സമിതിയെ നിയോഗിക്കാൻ സർക്കാർ തീരുമാനിച്ചത്.
