അക്ഷയ് കുമാറും പ്രിയദർശനും ഒന്നിക്കുന്ന ഹൊറർ കോമഡി ഗണത്തിൽപെടുന്ന ‘ഭൂത് ബംഗ്ല’ ട്രെയിലർ എത്തി. പതിനാല് വർഷങ്ങൾക്കു ശേഷമാണ് ഇരുവരും ഒന്നിക്കുന്നത്. ഏഴാം തവണയാണ് അക്ഷയ് കുമാറും പ്രിയദർശനും ഒന്നിച്ചെത്തുന്നത്. 2010ൽ പുറത്തിറങ്ങിയ ‘ഖാട്ടാ മീട്ട’യാണ് ഇരുവരും അവസാനം ഒന്നിച്ച ചിത്രം. 2026 ഏപ്രില് 16ന് ‘ഭൂത് ബംഗ്ല’ തിയറ്ററുകളില് എത്തും.
2021ൽ പുറത്തിറങ്ങിയ ‘ഹങ്കാമ 2’വിനു ശേഷം പ്രിയദർശൻ സംവിധാനം ചെയ്യുന്ന ബോളിവുഡ് ചിത്രം കൂടിയാണിത്. പ്രിയദര്ശനും അക്ഷയ് കുമാറും ഒന്നിച്ച ‘ഭൂല് ഭുലയ്യ’ ചിത്രീകരിച്ച അതേ ലൊക്കേഷനിലാണ് പുതിയ ചിത്രമായ ‘ഭൂത് ബംഗ്ല’യും ചിത്രീകരിച്ചിരിക്കുന്നത്. ജയ്പൂരിലെ ചോമു പാലസ് ആണ് പ്രസ്തുത ലൊക്കേഷന്. ജയ്പൂര്, ലണ്ടൻ, മുംബൈ എന്നിവിടങ്ങളിലാണ് ചിത്രത്തിൻ്റെ ലൊക്കേഷൻ. വിഎഫ്എക്സിന് ഏറെ പ്രാധാന്യമുള്ള ചിത്രം കൂടിയാണ് ഇത്. അക്ഷയ് കുമാറിനൊപ്പം പരേഷ് റാവല്, തബു, വമിഖ ഗബ്ബി, അസ്രാണി, രാജ്പാല് യാദവ് തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.
