കർണാടക സർക്കാരിൻ്റെ തൊഴിൽമേള ജനുവരിയിൽ

വിദേശത്ത് ജോലിനേടിക്കൊടുക്കാൻ അന്താരാഷ്ട്ര തൊഴിൽമേളയുമായി കർണാടക സർക്കാർ. 2026 ജനുവരിയിൽ ബാംഗ്ലൂരിൽ മേള നടത്തുന്നത്. യൂറോപ്പ്, ഗൾഫ് രാജ്യങ്ങൾ, തുടങ്ങിയിടങ്ങളിൽനിന്ന് തൊഴിൽദാതാക്കളെ ബെംഗളൂരുവിലെത്തിച്ച് ഇവിടെത്തന്നെ നിയമനനടപടികൾ ആരംഭിക്കും. തൊഴിൽവൈദഗ്ധ്യം വർധിപ്പിക്കാനുള്ള പരിശീലനപരിപാടികളും നൈപുണി വികസനവകുപ്പ് നടത്തുന്നുണ്ട്. വിദേശരാജ്യങ്ങളിലെ തൊഴിൽസാധ്യത പ്രയോജനപ്പെടുത്താൻ വിദേശ ഭാഷകളിൽ കോഴ്‌സും ആരംഭിച്ചിട്ടുണ്ട്. വിദേശത്തേക്ക് ആളുകളെ ജോലിക്കയക്കുന്ന കേരളമാതൃക പിന്തുടർന്നാണ് വിദേശജോലി നൽകുന്നതിന് മേള സംഘടിപ്പിക്കുന്നതെന്ന് കർണാടക നൈപുണി വികസനവകുപ്പ് അധികൃതർ പറഞ്ഞു. നഴ്‌സുമാർ, മെക്കാനിക്കുകൾ, കെയർടേക്കർമാർ, മരപ്പണിക്കാർ, പ്ലംബർമാർ, മറ്റ് വിദഗ്‌ധതൊഴിലാളികൾ തുടങ്ങിയവരെ ലക്ഷ്യമാക്കിയാണ് മേള നടത്തുന്നത്.