മാസം: ഒക്ടോബർ 2025

അറബിക്കടലിൽ ഇന്ന് രാവിലെയോടെ രൂപംകൊണ്ട ‘ശക്തി’ ചുഴലിക്കാറ്റ് മഹാരാഷ്‌ട്ര, ഗുജറാത്ത് തീരങ്ങളിൽ തീവ്രമാകുന്നു. തീരങ്ങളില്‍ ഇതോടെ ശക്‌തമായ ഇടിമിന്നലിന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കി. ചൊവ്വാഴ്‌ച വരെ ഗുജറാത്ത്-മഹാരാഷ്‌ട്ര തീരത്ത് തിരകള്‍ ശക്തി പ്രാപിക്കാനും മോശം കാലാവസ്ഥയ്‌ക്കും സാധ്യതയുണ്ട്. മണിക്കൂറിൽ 45-55 കിലോമീറ്റർ മുതൽ 65 കിലോമീറ്റർ വരെ വേഗതയിൽ കാറ്റുവീശാനും സാധ്യതയുണ്ടെന്ന് പ്രവചിക്കുന്നു. മത്സ്യത്തൊഴിലാളികൾ കടലിൽ പോകരുതെന്ന് മുന്നറിയിപ്പുണ്ട്.

ഒൻപത് വയസുകാരിയുടെ കൈ മുറിച്ചു മാറ്റിയ സംഭവത്തിൽ ഡോക്ടർമാരുടെ ഭാഗത്ത് പിഴവ് സംഭവിച്ചിട്ടില്ലെന്ന് അന്വേഷണ റിപ്പോർട്ട്. പാലക്കാട് ജില്ലാ ആശുപത്രിയിൽ പെൺകുട്ടിക്ക് കൃത്യമായ ചികിത്സ ലഭിച്ചിരുന്നുവെന്നും സെപ്തംബർ 30 ന് കുട്ടിയെ ആശുപത്രിയിൽ എത്തിച്ചപ്പോൾ കൈയിലെ രക്തയോട്ടം നിലച്ചിരുന്നുവെന്നും റിപ്പോർട്ട് പറയുന്നു. പാലക്കാട് ജില്ലാ ആശുപത്രിയിൽ ഉടൻ പ്രാഥമിക ചികിത്സ നൽകിയ ശേഷം കുട്ടിയെ കോഴിക്കോടേക്ക് മാറ്റുകയായിരുന്നുവെന്നും റിപ്പോർട്ട് വിശദീകരിക്കുന്നു. പാലക്കാട് ഡിഎംഒ നിയോഗിച്ച രണ്ട് ഡോക്ടർമാരാണ് സംഭവം അന്വേഷിച്ചത്.

ശബരിമല സ്ത്രീപ്രവേശന വിഷയത്തില്‍ സര്‍ക്കാരിൻ്റെ സമീപനത്തിനെതിരെ പ്രതികരിച്ച് ബിന്ദു അമ്മിണി രം​ഗത്ത്. നവോത്ഥാന മൂല്യങ്ങളെയും കോടതി വിധികളെയും അവഗണിച്ച് പിണറായി വിജയന്‍ സര്‍ക്കാര്‍ പിന്നോട്ടുപോകുകയാണെന്ന് അവര്‍ പറഞ്ഞു. “ഇപ്പോൾ സര്‍ക്കാര്‍ സ്വീകരിച്ചിരിക്കുന്ന നിലപാട് പുരോഗമനവാദികളെയും നവോത്ഥാന പ്രസ്ഥാനങ്ങളെയും വഞ്ചിക്കുന്നതാണ്. ‘വിശ്വാസം സംരക്ഷിക്കും ഞങ്ങൾ ആചാരം സംരക്ഷിക്കും’ എന്ന തരത്തിലുള്ള പ്രസ്താവനകൾ മുൻകാലത്തിലുള്ള പുരോഗമന പാതയോട് പൊരുത്തപ്പെടുന്നതല്ല. സാധാരണ ജനങ്ങള്‍ പോലും സര്‍ക്കാരിൻ്റെ ഈ നിലപാട് പരിഹാസത്തോടെയാണ് കാണുന്നത്,” ബിന്ദു അമ്മിണി

നെടുമ്പാശേരി അന്താരാഷ്ട്ര വിമാനത്താവളത്തിൽ 6 കോടി രൂപ വിലമതിക്കുന്ന ആറ് കി ലോ ഹൈബ്രിഡ് കഞ്ചാവുമായി കൊടുങ്ങല്ലൂർ സ്വദേശി കസ്റ്റംസിൻ്റെ പിടിയിലായി. കൊടുങ്ങല്ലൂർ സ്വദേശിയായ അബ്ദുൽ ജലീൽ ജസ്മാലാണ് പിടിയിലായത്. ഫാഷൻ ഡിസൈനർ ആണ് പിടിയിലായ അബ്ദുൽ ജലീൽ ജസ്‌മാൽ. ബാങ്കോക്കിൽ നിന്നാണ് ഇയാൾ കഞ്ചാവ് എത്തിച്ചതെന്ന് കസ്റ്റംസ് അറിയിച്ചു. ബാങ്കോക്കിൽ നിന്ന് പ്രതി കഞ്ചാവ് സിംഗപ്പൂരിലെത്തിക്കുകയും തുടർന്ന് വിമാനമാർഗം കൊച്ചിയിലേക്ക് കൊണ്ടുവരികയായിരുന്നു.

പാലക്കാട് മുണ്ടൂരിന് സമീപം ഒടുവങ്ങാടിൽ വന്യജീവി ആക്രമണം. പുലിയാണെന്നാണ് നിഗമനം. ഇന്ന് രാവിലെയാണ് പ്രദേശത്ത് വളർത്തു നായയെ പുലിയെന്ന് കരുതുന്ന ജീവി ആക്രമിച്ചത്. നാട്ടുകാർ വനംവകുപ്പ് അധികൃതരെ വിവരം അറിയിച്ചു. പ്രദേശത്ത് വനംവകുപ്പ് പരിശോധന നടത്തും. മുൻപും ഈ പ്രദേശത്ത് വന്യജീവി ആക്രമണങ്ങൾ നേരിട്ടിട്ടുണ്ട്.

കണ്ണൂർ സെൻട്രൽ ജയിലിൽ നിന്ന് സ്മാർട്ട്‌ ഫോണും ചാർജറും പിടികൂടി. അഞ്ചാം ബ്ലോക്കിൻ്റെ പിറകുവശത്തു നിന്നാണ് സ്മാർട്ട്‌ ഫോണും ചാർജറും കണ്ടെത്തിയത്. സൂപ്രണ്ടിൻ്റെ പരാതിയിൽ ടൗൺ പൊലീസ് കേസെടുത്തു. കഴിഞ്ഞ ഏതാനും ദിവസങ്ങളായി ജയിലനകത്ത് പരിശോധന ശക്തമാക്കിയിരുന്നു. പൊലീസ് അന്വേഷണം തുടങ്ങി. നേരത്തേയും കണ്ണൂർ സെൻട്രൽ ജയിലിൽ നിന്ന് ഫോൺ പിടിച്ചെടുത്തിട്ടുണ്ട്.