ബസ് യാത്രാനിരക്കും നന്ദിനി പാലിൻ്റെയും തൈരിൻ്റെയും വിലയും വർധിപ്പിച്ച സംസ്ഥാന സർക്കാരിൻ്റെ നടപടിക്കെതിരെ കർണാടകയിൽ ഇന്ന് ബിജെപി പ്രതിഷേധിക്കും. കോൺഗ്രസ് സർക്കാരിൻ്റെ നയങ്ങൾ സാധാരണക്കാരുടെ ജീവിതച്ചെലവ് വർധിപ്പിക്കുകയാണെന്നും പൊതുഗതാഗത മേഖലയിലെ സാമ്പത്തിക പ്രതിസന്ധിക്ക് സർക്കാർ തന്നെയാണ് ഉത്തരവാദിയെന്നും ബിജെപി ആരോപിച്ചു.
മുഖ്യമന്ത്രി ഡി.കെ. ശിവകുമാറിൻ്റെ നേതൃത്വത്തിലുള്ള സർക്കാർ ജനങ്ങളുടെ ബുദ്ധിമുട്ടുകൾ പരിഗണിക്കാതെയാണ് തീരുമാനങ്ങളെടുക്കുന്നതെന്ന് ബിജെപി സംസ്ഥാന അധ്യക്ഷൻ ബി.വൈ. വിജയേന്ദ്ര പറഞ്ഞു. പാലിൻ്റെ വില വർധിപ്പിച്ചതിന് പിന്നാലെ ബസ് നിരക്കും കൂട്ടിയത് ജനങ്ങൾക്ക് ഇരട്ടപ്രഹരമായെന്നും അദ്ദേഹം കുറ്റപ്പെടുത്തി.
നന്ദിനി പാലിൻ്റെയും തൈരിൻ്റെയും വിലവർധന ഒരു കുടുംബത്തിൻ്റെ പ്രതിമാസ ചെലവിൽ ഏകദേശം 390 രൂപയുടെ അധികബാധ്യതയുണ്ടാക്കുമെന്നും അശോക ആരോപിച്ചു. സംസ്ഥാനത്തിൻ്റെ സാമ്പത്തിക സ്ഥിതി വ്യക്തമാക്കുന്ന ധവളപത്രം പുറത്തിറക്കണമെന്നും അദ്ദേഹം ആവശ്യപ്പെട്ടു.
നാല് പൊതുഗതാഗത കോർപറേഷനുകൾക്കായി സർക്കാർ 5,650.9 കോടി രൂപയുടെ കുടിശ്ശിക വരുത്തിയിട്ടുണ്ടെന്നാണ് പ്രതിപക്ഷ നേതാവ് ആർ. അശോകയുടെ ആരോപണം. കെ.എസ്.ആർ.ടി.സിക്ക് 2,943 കോടി, എൻ.ഡബ്ല്യു.കെ.ആർ.ടി.സിക്ക് 1,306 കോടി, ബി.എം.ടി.സിക്ക് 1,019 കോടി, കെ.കെ.ആർ.ടി.സിക്ക് 999 കോടി രൂപ വീതം ലഭിക്കാനുണ്ടെന്നും അദ്ദേഹം വ്യക്തമാക്കി. ഈ തുക സമയബന്ധിതമായി നൽകിയിരുന്നെങ്കിൽ നിരക്ക് വർധിപ്പിക്കേണ്ട സാഹചര്യമുണ്ടാകുമായിരുന്നില്ലെന്നും അശോക പറഞ്ഞു.
ബസ് നിരക്ക് 40 ശതമാനം വരെ വർധിപ്പിച്ചെന്ന ആരോപണവും അദ്ദേഹം ഉന്നയിച്ചു. ഗ്യാരന്റി പദ്ധതികൾക്കുള്ള പണം സർക്കാർ തിരിച്ചുനൽകാത്തതാണ് ഗതാഗത കോർപറേഷനുകളുടെ സാമ്പത്തിക സ്ഥിതി മോശമാക്കിയതെന്നും 2026 മേയ് വരെയുള്ള കണക്കനുസരിച്ച് ഇവയുടെ മൊത്തം ബാധ്യത 7,130.8 കോടി രൂപയിലെത്തിയെന്നും അശോക ചൂണ്ടിക്കാട്ടി. വാഹനങ്ങളുടെ അറ്റകുറ്റപ്പണിക്കാവശ്യമായ സ്പെയർ പാർട്സുകൾ വാങ്ങാൻ പോലും കോർപറേഷനുകൾക്ക് പ്രയാസമുണ്ടെന്നും അദ്ദേഹം പറഞ്ഞു.
കേന്ദ്രമന്ത്രി പ്രഹ്ലാദ് ജോഷിയും സർക്കാരിനെതിരെ വിമർശനവുമായി രംഗത്തെത്തി. സൗജന്യ യാത്രയുൾപ്പെടെയുള്ള ഗ്യാരന്റി പദ്ധതികൾ പ്രഖ്യാപിച്ച സർക്കാർ ഇപ്പോൾ ബസ് നിരക്ക് വർധിപ്പിച്ച് തൊഴിലാളികളെയും സാമ്പത്തികമായി പിന്നാക്കം നിൽക്കുന്നവരെയും പ്രതിസന്ധിയിലാക്കുകയാണെന്ന് അദ്ദേഹം കുറ്റപ്പെടുത്തി. അതേസമയം, പെട്രോൾ, ഡീസൽ വില കേന്ദ്രസർക്കാർ കുറയ്ക്കുകയാണെങ്കിൽ ബസ് നിരക്ക് കുറയ്ക്കാൻ സംസ്ഥാന സർക്കാർ തയ്യാറാണെന്ന നിലപാടും സർക്കാർ വൃത്തങ്ങൾ അറിയിച്ചു.
