അണ്ടർ 19 ലോകകപ്പിൽ ഓസ്ട്രേലിയയെ തകർത്ത് ഇംഗ്ലണ്ട് ഫൈനലിൽ കടന്നു. ഇന്ന് നടന്ന സെമിഫൈനലിൽ 27 റൺസിനാണ് കരുത്തരായ ഓസ്ട്രേലിയയെ ഇംഗ്ലീഷ് പട തകർത്തത്.
ഇംഗ്ലണ്ട് ഉയർത്തിയ 278 റൺസ് വിജയലക്ഷ്യം പിന്തുടർന്ന ഓസ്ട്രേലിയ 250 റൺസിൽ ഓൾഔട്ടായി. ഓസീസ് ക്യാപ്റ്റൻ ഒലിവർ പീക്ക് തകർപ്പൻ സെഞ്ചുറിയുമായി പൊരുതിയെങ്കിലും ടീമിനെ വിജയിപ്പിക്കാനായില്ല. ആദ്യം ബാറ്റ് ചെയ്ത ഇംഗ്ലണ്ട് 50 ഓവറിൽ ഏഴ് വിക്കറ്റ് നഷ്ടത്തിലാണ് 277 റൺസെടുത്തത്. സെ‌ഞ്ചുറി നേടിയ ക്യാപ്റ്റൻ തോമസ് റൂവിന്‍റെയും കാലെബ് ഫാൽകോണറിന്‍റെ ഇന്നിംഗ്സിന്‍റെയും ബലത്തിലാണ് ഇംഗ്ലണ്ട് മികച്ച സ്കോർ പടുത്തുയർത്തിയത്. രണ്ടാം സെമിയിൽ ഇന്ത്യ നാളെ അഫ്‌ഗാനിസ്ഥാനെ നേരിടും.
