എറണാകുളം പുതുവൈപ്പിൽ മത്സ്യബന്ധനത്തിനിടെ വള്ളം മറിഞ്ഞുണ്ടായ അപകടത്തിൽ രണ്ട് മത്സ്യത്തൊഴിലാളികൾ മരിച്ചു. പുതുവൈപ്പ് സ്വദേശികളായ ദേവസിയും ബാബുവുമാണ് മരിച്ചത്. ഇന്ന് പുലർച്ചെയായിരുന്നു അപകടം.
മത്സ്യബന്ധനത്തിനായി കടലിലേക്ക് പോയ വള്ളം തിരമാലയിൽപ്പെട്ട് തലകീഴായി മറിയുകയായിരുന്നു. വള്ളത്തിലുണ്ടായിരുന്ന അഞ്ച് പേരെയും രക്ഷാപ്രവർത്തകർ പുറത്തെടുത്തെങ്കിലും ദേവസിയുടെയും ബാബുവിൻ്റെയും ജീവൻ രക്ഷിക്കാനായില്ല.
പരിക്കേറ്റവരെ ഉടൻ എറണാകുളം ജനറൽ ആശുപത്രിയിലെത്തിച്ചെങ്കിലും ഇരുവരും മരണത്തിന് കീഴടങ്ങി. മൃതദേഹങ്ങൾ ജനറൽ ആശുപത്രി മോർച്ചറിയിലേക്ക് മാറ്റി.
വള്ളത്തിലുണ്ടായിരുന്ന മറ്റൊരാൾ ആശുപത്രിയിൽ ചികിത്സയിലാണ്. ശേഷിക്കുന്ന രണ്ട് പേരുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു. അപകടത്തിൻ്റെ സാഹചര്യങ്ങളെക്കുറിച്ച് കൂടുതൽ അന്വേഷണം പുരോഗമിക്കുകയാണ്.
