കൊല്ലത്ത് മുഖ്യമന്ത്രിയുടെ വാര്ത്താസമ്മേളനത്തിനിടെ ദേശാഭിമാനിയുടെ ഒരു ചോദ്യത്തിനും കൈരളിയുടെ രണ്ട് ചോദ്യങ്ങള്ക്കും മറുപടി പറഞ്ഞു മുഖ്യമന്ത്രി മടങ്ങിയതോടെ മറ്റ് മാധ്യമപ്രവർത്തകർ എതിർപ്പ് അറിയിച്ചു. ചോദ്യങ്ങൾ ഇനിയുമുണ്ടെന്നും മറുപടി വേണമെന്നും മാധ്യമപ്രവര്ത്തകര് പറയുമ്പോഴും മുഖ്യമന്ത്രി ഇനി നാളെയെന്ന് പറഞ്ഞ് നടന്ന് പുറത്തേക്ക് പോവുകയായിരുന്നു.
ഇതിനെ മറ്റ് മാധ്യമപ്രവര്ത്തകര് ഒന്നടങ്കം ചോദ്യം ചെയ്തു. ഇതോടെ പുറത്തേയ്ക്ക് പോയ മുഖ്യമന്ത്രി തിരികെയെത്തി. തിരികെയെത്തിയെങ്കിലും മാധ്യമങ്ങളുടെ ചോദ്യത്തിന് മറുപടി നൽകാൻ മുഖ്യമന്ത്രി കൂട്ടാക്കിയില്ല. ചോദ്യങ്ങള് മനസിലുണ്ടായാൽ പോരെന്നും ചോദിക്കണമെന്നും മുഖ്യമന്ത്രി പറഞ്ഞു.
താൻ ചോദ്യങ്ങള്ക്ക് ഉത്തരം നൽകിയെന്നും ചോദ്യം ചോദിച്ച മാധ്യമപ്രവര്ത്തകര് ഏതാണെന്നോ ആരാണെന്നോ താൻ ചോദിച്ചിട്ടില്ലെന്നും സമയം കഴിഞ്ഞെന്നും അതുകൊണ്ടാണ് അവസാനിപ്പിക്കുന്നതെന്നും പറഞ്ഞു മുഖ്യമന്ത്രി തിരികെ പോവുകയായിരുന്നു.
