ദ്രാവിഡ ഭാഷാ വിവർത്തകരുടെ സംഘടനയായ Dravida Bhasha Translators Association (DBTA) പ്രതിവർഷം നൽകിവരുന്ന പ്രതിഷ്ഠിത DBTA വിവർത്തന പുരസ്കാരം – 2026 ന് ഈ വർഷം തമിഴ് മൂലകൃതിയായ ‘സുളുന്ധീ’ എന്ന നോവൽ തിരഞ്ഞെടുക്കപ്പെട്ടു.
പ്രശസ്ത തമിഴ് കവിയും എഴുത്തുകാരനുമായ മുത്തുനാഗു രചിച്ച ‘സുളുന്ധീ’ എന്ന നോവൽ തെലുങ്കിലേക്ക് മികവോടെ വിവർത്തനം ചെയ്ത ബൊള്ളി രാമസ്വാമി രഘുപതിയുടെ വിവർത്തന കൃതിക്കാണ് ഈ വർഷത്തെ പുരസ്കാരം. മൂലകൃതിയുടെ ആശയം, ഭാഷയുടെ സൗന്ദര്യം, സാമൂഹികമായ സംവേദനങ്ങൾ, സാഹിത്യപരമായ സവിശേഷതകൾ എന്നിവ തെലുങ്ക് വായനക്കാരിലേക്ക് ഫലപ്രദമായി എത്തിക്കുന്നതിൽ വിവർത്തകൻ പ്രകടിപ്പിച്ച സർഗാത്മകതയും ഭാഷാപരമായ മികവും പരിഗണിച്ചാണ് ഈ കൃതി പുരസ്കാരത്തിനായി തിരഞ്ഞെടുക്കപ്പെട്ടത്.
ദ്രാവിഡ ഭാഷകൾക്കിടയിലെ സാഹിത്യബന്ധം ശക്തിപ്പെടുത്തുകയും ഒരു ദ്രാവിഡ ഭാഷയിലെ മികച്ച സാഹിത്യകൃതികളെ മറ്റൊരു ദ്രാവിഡ ഭാഷയിലെ വായനക്കാരിലേക്ക് എത്തിക്കുന്ന വിവർത്തകരുടെ മഹത്തായ സംഭാവനകളെ അംഗീകരിക്കുകയും ചെയ്യുക എന്നത് DBTAയുടെ പ്രധാന ലക്ഷ്യങ്ങളിലൊന്നാണ്. ഈ ലക്ഷ്യത്തിൻ്റെ തുടർച്ചയായി നൽകുന്ന ഈ പുരസ്കാരം, തമിഴ് സാഹിത്യത്തിൽ നിന്ന് തെലുങ്ക് സാഹിത്യത്തിലേക്ക് പണിതുയർത്തിയ ഒരു സുപ്രധാന സാംസ്കാരിക പാലത്തിനുള്ള ആദരം കൂടിയാണ്.
സെപ്റ്റംബർ 26-ന് ബെംഗളൂരുവിലെ രവീന്ദ്ര കലാക്ഷേത്രത്തിലെ നയന സഭാംഗണത്തിൽ നടക്കുന്ന ഡിബിറ്റിഎ യുടെ അഞ്ചാംവാർഷികോത്സവത്തിൽ കന്നട ഭാഷാ വികസന അതോറിറ്റിയുടെ പ്രസിഡണ്ട് ഡോ.പുരുഷോത്തമൻ ബിളിമല പുരസ്കാരം സമർപ്പിക്കും. ₹11,111 രൂപയുടെ ക്യാഷ് അവാർഡ്, പ്രശസ്തിപത്രവും, സ്മരണികയും ഉൾപ്പെടുന്നതാണ് പുരസ്കാരം.
ദ്രാവിഡ ഭാഷാ വിവർത്തകരുടെ സംഘടന കഴിഞ്ഞ ഏതാനും വർഷങ്ങളായി ദ്രാവിഡ ഭാഷകൾക്കിടയിലെ വിവർത്തന പ്രവർത്തനങ്ങൾക്ക് പ്രോത്സാഹനം നൽകുകയും വിവിധ ഭാഷകളിലെ സാഹിത്യത്തെ പരസ്പരം പരിചയപ്പെടുത്തുകയും ചെയ്യുന്ന മഹത്തായ പ്രവർത്തനങ്ങൾ തുടർച്ചയായി നടത്തിവരികയാണ്. 2024-ൽ തമിഴ് വിവർത്തനത്തിനും 2025-ൽ കന്നഡ വിവർത്തനത്തിനും DBTA വിവർത്തന പുരസ്കാരം നൽകിയിരുന്നു. 2027-ലെ പുരസ്കാരം മലയാളം വിവർത്തനത്തിനായി നൽകാൻ സംഘടന തീരുമാനിച്ചിട്ടുണ്ട്.
ഈ പുരസ്കാരം ദ്രാവിഡ ഭാഷകൾക്കിടയിലെ സാഹിത്യബന്ധം കൂടുതൽ ശക്തിപ്പെടുത്തുകയും വിവർത്തകർക്ക് പുതിയ പ്രചോദനം നൽകുകയും വിവിധ ദ്രാവിഡ ഭാഷകളിലെ അമൂല്യമായ സാഹിത്യകൃതികൾ പരസ്പര ഭാഷകളിലെ കൂടുതൽ വായനക്കാരിലേക്ക് എത്തിച്ചേരാൻ വഴിയൊരുക്കുകയും ചെയ്യട്ടെ എന്നതാണ് DBTAയുടെ ആശയം എന്ന് പ്രസിഡണ്ട് ഡോ. സുഷമ ശങ്കർ പറഞ്ഞു.
