തുടർച്ചയായി ആറുമാസം റേഷൻ വാങ്ങാത്ത ആറുലക്ഷത്തോളം കുടുംബങ്ങളുടെ റേഷൻ കാർഡുകൾ ഒഴിവാക്കാനുള്ള നടപടിയുമായി സംസ്ഥാന സർക്കാർ. ഇതോടെ ഏകദേശം 18 ലക്ഷം പേർക്ക് തിരിച്ചടിയാകുമെന്നാണ് വിലയിരുത്തൽ. റേഷൻ പട്ടികയിൽനിന്ന് പുറത്താകുന്നതിനൊപ്പം വിവിധ സർക്കാർ ആനുകൂല്യങ്ങൾക്കുള്ള അർഹതയെയും ഇത് ബാധിച്ചേക്കാം.
കേന്ദ്രസർക്കാരിൻ്റെ നിർദേശപ്രകാരം ഒക്ടോബർ ഒന്നുമുതൽ നടപടി ആരംഭിക്കാനാണ് തീരുമാനം. എന്നാൽ താൽക്കാലികമായി നാട്ടിൽനിന്ന് മാറിനിൽക്കുന്നവരും ആറുമാസമായി റേഷൻ വാങ്ങാത്തവരുടെ പട്ടികയിൽ ഉൾപ്പെട്ടിട്ടുണ്ടാകാമെന്ന ആശങ്കയുണ്ട്. മഞ്ഞ, പിങ്ക് വിഭാഗങ്ങളിലെ മുൻഗണനാ കാർഡുകളിലാണ് കേന്ദ്രനിർദേശം പ്രധാനമായും ബാധകമാകുക. വെള്ള, നീല കാർഡുകളിൽ സംസ്ഥാന സർക്കാരിന് തീരുമാനമെടുക്കാം.
സർക്കാർ കണക്കുകൾ പ്രകാരം 5,370 മഞ്ഞ കാർഡുകളും 38,909 പിങ്ക് കാർഡുകളും 4,40,811 വെള്ള കാർഡുകളും 1,21,683 നീല കാർഡുകളുമാണ് നടപടിയുടെ പരിധിയിൽ വരുന്നത്. കേന്ദ്രനിർദേശം മുൻനിർത്തി ഇവ ഒഴിവാക്കാനുള്ള നടപടികളാണ് പുരോഗമിക്കുന്നത്. എന്നാൽ കാർഡുകൾ ഒഴിവാക്കാൻ തീരുമാനിച്ചിട്ടില്ലെന്നാണ് ഭക്ഷ്യവകുപ്പ് മന്ത്രി അനൂപ് ജേക്കബ് വ്യക്തമാക്കിയത്.
ഓരോ മാസവും 21ന് തുടർച്ചയായി റേഷൻ വാങ്ങാത്ത കാർഡുടമകളെ കണ്ടെത്താനും അടുത്ത മാസം ഒന്നുമുതൽ അത്തരം കാർഡുകൾ പ്രവർത്തനരഹിതമാക്കാനും നിർദേശമുണ്ട്. പിന്നീട് പ്രതിമാസ റേഷൻ വിഹിതം ലഭിക്കില്ല. മൂന്ന് മാസത്തിനുള്ളിൽ കാർഡിലെ മുഴുവൻ ഗുണഭോക്താക്കളും ഇ-കെവൈസി പൂർത്തിയാക്കിയാൽ മാത്രമേ കാർഡ് വീണ്ടും സജീവമാക്കൂ.
അതേസമയം, മഞ്ഞ, പിങ്ക് വിഭാഗങ്ങളിലെ കാർഡുകൾ വലിയ തോതിൽ ഒഴിവാക്കിയാൽ കേന്ദ്രത്തിൽനിന്നുള്ള റേഷൻ വിഹിതം കുറയാൻ സാധ്യതയുണ്ടെന്ന ആശങ്ക ഉദ്യോഗസ്ഥർ ഉന്നതതല യോഗത്തിൽ പങ്കുവച്ചിട്ടുണ്ട്. കാർഡുകളുടെ എണ്ണം കുറയുന്നത് കേന്ദ്രവിഹിതം വെട്ടിക്കുറയ്ക്കാൻ കാരണമാകുമെന്നതാണ് ആശങ്ക.
