ഫിഫ ലോകകപ്പിലെ ഗ്രൂപ്പ് ബി മത്സരത്തിൽ സ്വിറ്റ്‌സർലൻഡിനെ അവസാന നിമിഷത്തെ ഗോളിൽ സമനിലയിൽ തളച്ച് ഖത്തർ. സാൻ ഫ്രാൻസിസ്കോ ബേ ഏരിയ സ്റ്റേഡിയത്തിൽ നടന്ന ആവേശപ്പോരാട്ടം 1-1 എന്ന സ്കോറിലാണ് അവസാനിച്ചത്. മത്സരത്തിൻ്റെ തുടക്കത്തിൽ തന്നെ ആക്രമണ ഫുട്ബോൾ പുറത്തെടുത്ത സ്വിറ്റ്‌സർലൻഡ് 17-ാം മിനിറ്റിൽ ലീഡെടുത്തു. മുന്നേറ്റ താരം ബ്രീൽ എംബോളോ നേടിയ ഗോളാണ് സ്വിസ് സംഘത്തെ മുന്നിലെത്തിച്ചത്. ആദ്യ പകുതിയിലും രണ്ടാം പകുതിയുടെ ഭൂരിഭാഗം സമയത്തും മത്സരത്തിൻ്റെ നിയന്ത്രണം സ്വിറ്റ്‌സർലൻഡിനൊപ്പമായിരുന്നു.
എന്നാൽ ഒരു ഗോളിന് പിന്നിലായിട്ടും ഖത്തർ പോരാട്ടവീര്യം കൈവിട്ടില്ല. മത്സരം അവസാനിക്കാൻ നിമിഷങ്ങൾ മാത്രം ശേഷിക്കെ ഏഷ്യൻ ചാമ്പ്യന്മാർ തിരിച്ചടിച്ചു. ഇഞ്ചുറി ടൈമിൻ്റെ അഞ്ചാം മിനിറ്റിൽ ഹൊമാം അൽ അമീൻ്റെ ക്രോസിൽ നിന്ന് ബൗലെം ഖൂഖി നേടിയ ഹെഡർ ഗോളാണ് ഖത്തറിന് വിലപ്പെട്ട സമനില സമ്മാനിച്ചത്. ഈ സമനിലയോടെ ലോകകപ്പ് ചരിത്രത്തിൽ ആദ്യമായി ഖത്തർ പോയിന്റ് പട്ടികയിൽ ഇടംപിടിച്ചു. 2022 ലോകകപ്പിൽ ആതിഥേയരായിരുന്നിട്ടും ഒരു പോയിന്റ് പോലും നേടാനാകാതിരുന്ന ഖത്തറിന് ഈ നേട്ടം ചരിത്രപരമായ നിമിഷമായി. അതേസമയം ഖത്തർ ടീമിൽ ഇടംപിടിച്ച മലയാളി താരം തഹ്സീൻ കളത്തിലിറങ്ങുമെന്ന പ്രതീക്ഷ ഉണ്ടായിരുന്നെങ്കിലും മത്സരത്തിൽ അവസരം ലഭിച്ചില്ല. സ്വിറ്റ്‌സർലൻഡിനെതിരായ പോരാട്ടത്തിൽ അവസാന വിസിൽ വരെ പൊരുതിയ ഖത്തർ, ലോകകപ്പ് വേദിയിൽ തങ്ങളുടെ വളർച്ചയുടെ സൂചനയാണ് ഈ പ്രകടനത്തിലൂടെ നൽകിയത്.
ഇന്ന് നടന്ന രണ്ടാം പോരാട്ടത്തിൽ മൊറോക്കോയ്‌ക്കെതിരെ സമനില പിടിച്ച് ബ്രസീൽ (1-1). ബ്രസീലിന്‍റെ സൂപ്പർ താരം വിനീഷ്യസ് ജൂനിയറിന്‍റെ ഗോളാണ് കാനറികളെ മത്സരത്തിലേക്ക് തിരികെ എത്തിച്ചത്. മത്സരത്തിന്‍റെ തുടക്കം മുതൽ മികച്ച ഫോമിലായിരുന്ന മൊറോക്കോ 21-ാം മിനിറ്റിൽ ബ്രസീലിനെ ഞെട്ടിച്ചുകൊണ്ട് ആദ്യ ഗോൾ നേടി. അലിസൺ ബെക്കറെ മറികടന്ന് ഇസ്മായിൽ സൈബാരി ആണ് മൊറോയ്ക്കക്കായി വലകുലുക്കിയത്.
മൊറോക്കോയുടെ ആക്രമണത്തിന് മുന്നിൽ ബ്രസീൽ പ്രതിരോധം പതറുന്നതിനിടെയാണ് 32-ാം മിനിറ്റിൽ വിനീഷ്യസ് ജൂനിയറിന്‍റെ മാസ്മരിക ഗോൾ. ബോക്സിനുള്ളിൽ ലഭിച്ച പന്ത് അതിമനോഹരമായ ഒരു ഫിനിഷിംഗിലൂടെ താരം മൊറോക്കോ ഗോൾകീപ്പർ ബോണോയെ കാഴ്ചക്കാരനാക്കി വലയുടെ മുകളിലെ കോണിലേക്ക് അടിച്ചുകയറ്റുകയായിരുന്നു. ആദ്യ പകുതി അവസാനിക്കുമ്പോൾ ഇരു ടീമുകളും ഒപ്പത്തിനൊപ്പം (1-1) ആയിരുന്നു. കാർലോ ആൻസലോട്ടിയുടെ കീഴിലിറങ്ങുന്ന ബ്രസീലിന് മധ്യനിരയിലെ പിഴവുകൾ രണ്ടാം പകുതിയിൽ തിരുത്തേണ്ടതുണ്ട്.
