ഫുട്പാത്ത് കയ്യേറ്റം ഒഴിപ്പിക്കാനുള്ള ബിബിഎംപിയുടെ നടപടിക്കെതിരെ ബെംഗളൂരുവിൽ തെരുവുകച്ചവടക്കാരുടെ പ്രതിഷേധം ശക്തമാകുന്നു. ഇന്ന് ഫ്രീഡം പാർക്കിൽ വിവിധ തെരുവുകച്ചവട തൊഴിലാളി സംഘടനകളുടെ നേതൃത്വത്തിൽ പ്രതിഷേധ സംഗമം നടക്കും.
മുൻകൂർ നോട്ടീസ് നൽകാതെയും പകരം കച്ചവടത്തിനുള്ള സ്ഥലമോ പുനരധിവാസ സംവിധാനമോ ഒരുക്കാതെയും ബിബിഎംപി അധികൃതർ കച്ചവടക്കാരെ ഒഴിപ്പിക്കുകയാണെന്നാണ് പ്രതിഷേധക്കാരുടെ ആരോപണം. നിരവധി കുടുംബങ്ങളുടെ ഏക വരുമാന മാർഗമാണ് തെരുവുകച്ചവടമെന്നും അപ്രതീക്ഷിത ഒഴിപ്പിക്കൽ ജീവിതം പ്രതിസന്ധിയിലാക്കിയെന്നും സംഘടനാ നേതാക്കൾ പറഞ്ഞു.
സമീപ ദിവസങ്ങളിലായി നഗരത്തിലെ പ്രധാന റോഡുകൾ, മെട്രോ സ്റ്റേഷനുകൾ, മാർക്കറ്റ് പരിസരങ്ങൾ എന്നിവിടങ്ങളിൽ ബിബിഎംപി വ്യാപകമായ ഒഴിപ്പിക്കൽ നടപടികൾ നടത്തിയിരുന്നു. ഇതിൻ്റെ തുടർച്ചയായാണ് പ്രതിഷേധം സംഘടിപ്പിച്ചിരിക്കുന്നത്.
തെരുവുകച്ചവടക്കാരുടെ അവകാശങ്ങൾ സംരക്ഷിക്കുന്ന Street Vendors Act, 2014 പൂർണമായി നടപ്പാക്കണമെന്നും, ടൗൺ വെൻഡിംഗ് കമ്മിറ്റികളുടെ അനുമതിയില്ലാതെ ഒഴിപ്പിക്കൽ നടപടികൾ അവസാനിപ്പിക്കണമെന്നും സംഘടനകൾ ആവശ്യപ്പെട്ടു.
പ്രതിഷേധത്തിൻ്റെ പശ്ചാത്തലത്തിൽ ഫ്രീഡം പാർക്ക് പരിസരത്ത് സുരക്ഷ ശക്തമാക്കിയിട്ടുണ്ട്. പ്രശ്നം ചർച്ചയിലൂടെ പരിഹരിക്കാൻ സർക്കാർ ഇടപെടണമെന്ന് വ്യാപാരികളും സാമൂഹിക സംഘടനകളും ആവശ്യപ്പെട്ടു.
