ഇന്ത്യയിൽ ജനാധിപത്യ ഭരണത്തലവനായി മുഖ്യമന്ത്രിയായും പ്രധാനമന്ത്രിയായും ഏറ്റവും കൂടുതൽ കാലം അധികാരത്തിലിരുന്ന വ്യക്തി എന്ന നേട്ടം സ്വന്തമാക്കി പ്രധാനമന്ത്രി നരേന്ദ്ര മോദി. ഈ പദവികളിൽ അദ്ദേഹം ആകെ 8,931 ദിവസങ്ങൾ ചിലവഴിച്ചിട്ടുണ്ട്. ഇന്ദിരാഗാന്ധിയുടെയും ജവഹർലാൽ നെഹ്‌റുവിന്‍റെയും റിക്കാർഡുകൾ മറികടന്നാണ് നരേന്ദ്ര മോദി ഈ ചരിത്ര നേട്ടം കൈവരിച്ചത്.
നരേന്ദ്ര മോദി ഗുജറാത്ത് മുഖ്യമന്ത്രിയായി ആദ്യമായി 2001 ഒക്ടോബർ 7 നാണ് അധികാരമേറ്റത്. തുടർന്ന് 12 വർഷത്തിലധികം (4,607 ദിവസങ്ങൾ) അദ്ദേഹം ആ പദവിയിൽ അധികാരത്തിലിരുന്നു. പ്രധാനമന്ത്രി എന്ന നിലയിൽ അദ്ദേഹം 4,324 ദിവസങ്ങൾ പൂർത്തിയാക്കി. 2014 മേയ് 26 ന് ഇന്ത്യയുടെ പ്രധാനമന്ത്രിയായി ചുമതലയേറ്റ അദ്ദേഹം നിലവിൽ തന്‍റെ മൂന്നാം ഊഴത്തിലാണ്.
മുൻ പ്രധാനമന്ത്രി ജവഹർലാൽ നെഹ്‌റു 6,130 ദിവസങ്ങളും ഇന്ദിരാഗാന്ധി 5,829 ദിവസങ്ങളുമാണ് പദവിയിലിരുന്നത്. എന്നാൽ ഇവരുടേത് പ്രധാനമന്ത്രി പദം മാത്രമായിരുന്നു. മുഖ്യമന്ത്രി പദം കൂടി കണക്കിലെടുക്കുമ്പോഴാണ് മോദി ഇവരേക്കാൾ മുന്നിലെത്തുന്നത്.
