യുവ വ്യവസായി കേതൻ അഗർവാളിൻ്റെ മരണവുമായി ബന്ധപ്പെട്ട കേസിൽ പ്രതിയായ സിയ ഗോയലിനെതിരെ സ്വന്തം മാതാപിതാക്കൾ തന്നെ കടുത്ത നിലപാട് സ്വീകരിച്ചു. അന്വേഷണത്തിൽ മകൾ കുറ്റക്കാരിയാണെന്ന് തെളിഞ്ഞാൽ നിയമപ്രകാരം ഏറ്റവും കർശനമായ ശിക്ഷ നൽകണമെന്നാണ് അമ്മ പൂജ ഗോയലും പിതാവ് പ്രവീൺ ഗോയലും ആവശ്യപ്പെട്ടത്.
“എന്റെ മകളാണെങ്കിലും കുറ്റം തെളിഞ്ഞാൽ കേതന് സംഭവിച്ചതുപോലെ തന്നെ കടുത്ത ശിക്ഷ ലഭിക്കണം” എന്നാണ് പൂജ ഗോയൽ പ്രതികരിച്ചത്. കേതന്റെ കുടുംബം സിയയെ സ്വന്തം മകളെപ്പോലെയാണ് സ്നേഹിച്ചിരുന്നതെന്നും വിവാഹ ഒരുക്കങ്ങൾ അവസാനഘട്ടത്തിലായിരുന്നെന്നും അവർ പറഞ്ഞു.
വിവാഹച്ചടങ്ങുകൾക്കായി കോടിക്കണക്കിന് രൂപ ചെലവഴിച്ചിരുന്നുവെന്നും സിയയ്ക്ക് കേതനുമായി എന്തെങ്കിലും പ്രശ്നമുണ്ടായിരുന്നെങ്കിൽ അത് കുടുംബത്തോട് തുറന്നുപറയാമായിരുന്നുവെന്നും മാതാപിതാക്കൾ വ്യക്തമാക്കി. വിവാഹത്തെക്കുറിച്ച് ഒരിക്കലും സിയ എതിർപ്പ് പ്രകടിപ്പിച്ചിരുന്നില്ലെന്നും അവർ കൂട്ടിച്ചേർത്തു.
സംഭവത്തെ തുടർന്ന് സിയയുടെ പിതാവ് പ്രവീൺ ഗോയലിന് ഹൃദയാഘാതമുണ്ടായി ആശുപത്രിയിൽ പ്രവേശിപ്പിക്കപ്പെട്ടിരുന്നു. എന്നിരുന്നാലും, അന്വേഷണത്തിൽ മകൾക്കെതിരെ കുറ്റം തെളിഞ്ഞാൽ നിയമം അനുശാസിക്കുന്ന കർശന നടപടികൾ സ്വീകരിക്കണമെന്നാണ് അദ്ദേഹവും ആവശ്യപ്പെട്ടത്.
ജൂൺ 18-ന് മഹാരാഷ്ട്രയിലെ ലോഹഗഡ് കോട്ടയിൽ ട്രക്കിങ്ങിനിടെ കേതൻ അഗർവാൾ മലയിടുക്കിലേക്ക് വീണ് മരിച്ചെന്നായിരുന്നു ആദ്യ വിവരം. തുടക്കത്തിൽ അപകടമരണമെന്ന നിലയിൽ പൊലീസ് കേസ് രജിസ്റ്റർ ചെയ്തിരുന്നെങ്കിലും, ടിക്കറ്റ് കൗണ്ടറിലെ സിസിടിവി ദൃശ്യങ്ങൾ പരിശോധിച്ചതിന് പിന്നാലെ സംഭവം ആസൂത്രിത കൊലപാതകമാണെന്ന സംശയം ശക്തമാകുകയും അന്വേഷണം അതനുസരിച്ച് മുന്നോട്ടുപോകുകയും ചെയ്തു.
