കർണാടകയിൽ ഭക്ഷ്യസുരക്ഷാ വകുപ്പ് നടത്തിയ സംസ്ഥാനവ്യാപക പരിശോധനയിൽ 1,000 കിലോയിലധികം കാലാവധി കഴിഞ്ഞതും സുരക്ഷിതമല്ലാത്തതുമായ ഭക്ഷ്യവസ്തുക്കൾ പിടിച്ചെടുത്തു. ത്രീ സ്റ്റാർ, ഫൈവ് സ്റ്റാർ ഹോട്ടലുകൾ ഉൾപ്പെടെയുള്ള ഹോട്ടലുകൾ, റെസ്റ്റോറന്റുകൾ, റിസോർട്ടുകൾ, പൊതുഭക്ഷണശാലകൾ എന്നിവിടങ്ങളിലാണ് പരിശോധന നടത്തിയത്.
ഗുരുതരമായ ശുചിത്വ, ഗുണനിലവാര ലംഘനങ്ങൾ കണ്ടെത്തിയ സ്ഥാപനങ്ങൾക്ക് നോട്ടീസ് നൽകി. മൈസൂരുവിൽ റിയോ മെറിഡിയൻ ഹോട്ടലിൽ നിന്ന് 9 കിലോ കാലാവധി കഴിഞ്ഞ കോഴിയിറച്ചിയും, ഗ്രാൻഡ് മെർക്കുർ ഹോട്ടലിൽ നിന്ന് 68 കിലോ മാംസവും, ക്യു സ്റ്റാർ ഹോട്ടലിൽ നിന്ന് 4 കിലോ കൂണും പിടിച്ചെടുത്തു.
മൈസൂരു, നഞ്ചൻഗുഡ് താലൂക്കുകളിലെ മൂന്ന് റിസോർട്ടുകളിലും പരിശോധന നടത്തി. ഇവിടെ നിന്ന് അഞ്ച് ഭക്ഷ്യസാമ്പിളുകൾ ലാബ് പരിശോധനയ്ക്കായി ശേഖരിച്ചു. ഏകദേശം 16 കിലോ കാലാവധി കഴിഞ്ഞതും പെട്ടെന്ന് കേടാകുന്നതുമായ ഭക്ഷ്യവസ്തുക്കൾ അധികൃതർ നശിപ്പിക്കുകയും ചെയ്തു.
ബെംഗളൂരുവിലെ വിധാൻ സൗധ, വികാസ സൗധ, ആരോഗ്യ സൗധ എന്നിവയ്ക്കുള്ളിലെ ഭക്ഷണശാലകളിലും ഭക്ഷ്യസുരക്ഷാ മാനദണ്ഡങ്ങളുടെ ലംഘനം കണ്ടെത്തി. വൃത്തിഹീനമായ ഭക്ഷണം കൈകാര്യം ചെയ്യൽ, അപര്യാപ്തമായ കീടനിയന്ത്രണം, കാലഹരണപ്പെട്ട ചേരുവകൾ എന്നിവ കണ്ടെത്തിയതായി അധികൃതർ അറിയിച്ചു. ചില സ്ഥാപനങ്ങൾക്ക് നോട്ടീസും ചിലതിന് അടച്ചുപൂട്ടൽ ഉത്തരവും നൽകി.
ബെംഗളൂരുവിലെ നഗരപരിധിയിൽ മാത്രം 60 ത്രീ സ്റ്റാർ, ഫൈവ് സ്റ്റാർ ഹോട്ടലുകളിൽ പരിശോധന നടത്തി 77 ഭക്ഷ്യസാമ്പിളുകൾ ലാബ് പരിശോധനയ്ക്കായി ശേഖരിച്ചു. മംഗളൂരുവിലെ കെഎഫ്‌സി ഔട്ട്‌ലെറ്റിൽ ഉപഭോക്തൃപരാതിയെ തുടർന്നുണ്ടായ പരിശോധനയ്ക്കു പിന്നാലെയാണ് സംസ്ഥാനവ്യാപക പരിശോധന ശക്തമാക്കിയത്.
