കനത്ത മഴ റോഡിൽ മണ്ണിടിച്ചിൽ; പാൽചുരത്തിലൂടെയുള്ള ഗതാഗതം നിരോധിച്ചു

കനത്ത മഴ, കൊട്ടിയൂർ പാൽച്ചുരം – ബോയ്‌സ് ടൗൺ റോഡിൽ മണ്ണിടിഞ്ഞു വീണതിനെ തുടർന്ന് ഇതുവഴിയുള്ള ഗതാഗതം പൂർണമായും നിരോധിച്ചു. ചൊവ്വാഴ്‌ച വൈകുന്നേരം ചെകുത്താൻ തോടിന് സമീപത്തായാണ് മണ്ണിടിഞ്ഞത്. മണ്ണിടിഞ്ഞതിനെ തുടർന്ന് നെടുംപൊയിൽ പേര്യ ചുരം വഴി വാഹനങ്ങൾ തിരിച്ചുവിട്ടു. വയനാട് കണ്ണൂർ ജില്ലകളെ ബന്ധിപ്പിക്കുന്ന പ്രധാന പാതയിലാണ് മണ്ണിടിഞ്ഞത്. മണ്ണിടിച്ചിൽ സമയത്ത് വാഹനങ്ങളൊന്നും വരാതിരുന്നതിനാൽ വലിയ അപകടം ഒഴിവായി. ജെസിബി എത്തിച്ച് പ്രദേശത്ത് കല്ലുകൾ നീക്കം ചെയ്‌ത്‌ വരികയാണ്. ഫയർഫോഴ്സും പോലീസും സ്ഥലത്തെത്തി. രാവിലെ മുതൽ പ്രദേശത്ത് ശക്തമായ മഴ പെയ്‌തിരുന്നു.