കേരള സർക്കാരിൻ്റെ ‘ഓപ്പറേഷൻ തൂഫാൻ’ ലഹരി ഉപയോഗത്തിനെതിരായ ശക്തമായ ജനകീയ മുന്നേറ്റമാണെന്ന് ഒളിമ്പ്യൻ അഞ്ജു ബോബി ജോർജ് പറഞ്ഞു. യുവാക്കളെ ലഹരിയിൽ നിന്ന് അകറ്റി നിർത്താൻ കായിക മേഖലയെ കൂടുതൽ പ്രോത്സാഹിപ്പിക്കേണ്ടത് അനിവാര്യമാണെന്നും ആരോഗ്യമുള്ള സമൂഹം വാർത്തെടുക്കാൻ കായിക സംസ്കാരം ശക്തിപ്പെടണമെന്നും അവർ അഭിപ്രായപ്പെട്ടു.
മൂവാറ്റുപുഴ നഗരസഭ, പൊലീസ്, എക്സൈസ് വകുപ്പുകൾ സംയുക്തമായി നടപ്പാക്കുന്ന ‘മിഷൻ ഡ്രഗ് ഫ്രീ മൂവാറ്റുപുഴ’ പദ്ധതിയുടെയും ‘ഓപ്പറേഷൻ തൂഫാൻ’ പ്രവർത്തനങ്ങളുടെയും ഭാഗമായി ഗ്രാൻഡ് സെൻട്രൽ മാളിൽ സംഘടിപ്പിച്ച ലഹരിവിരുദ്ധ ബോധവത്കരണ പരിപാടി ഉദ്ഘാടനം ചെയ്യുകയായിരുന്നു അഞ്ജു ബോബി ജോർജ്.
ചടങ്ങിൽ ‘തൂഫാൻ @ മൂവാറ്റുപുഴ’ എന്ന ജനകീയ ക്യാമ്പയിൻ്റെ ഔദ്യോഗിക ലോഗോയും അഞ്ജു ബോബി ജോർജ് പ്രകാശനം ചെയ്തു. സംസ്ഥാന ആഭ്യന്തര മന്ത്രി രമേശ് ചെന്നിത്തല പങ്കെടുക്കുന്ന വിപുലമായ ലഹരിവിരുദ്ധ പരിപാടിയുടെ ഭാഗമായാണ് ഈ ക്യാമ്പയിൻ സംഘടിപ്പിക്കുന്നത്.
ലഹരിവിമുക്ത മൂവാറ്റുപുഴ എന്ന ലക്ഷ്യത്തോടെ നഗരസഭ, പൊലീസ്, എക്സൈസ് വകുപ്പുകൾ ചേർന്ന് നടപ്പാക്കുന്ന പ്രവർത്തനങ്ങൾ കൂടുതൽ ശക്തിപ്പെടുത്തുമെന്നും ബോധവത്കരണ പരിപാടികൾ വ്യാപിപ്പിക്കുമെന്നും നഗരസഭ ചെയർപേഴ്സൺ ജോയ്സ് മേരി ആന്റണി അറിയിച്ചു.
പരിപാടിയുടെ ഭാഗമായി വിവിധ സ്കൂളുകളിലെ വിദ്യാർഥികളുമായി സംവദിച്ച അഞ്ജു ബോബി ജോർജ്, കായികത്തിൻ്റെ പ്രാധാന്യവും ലഹരിയുടെ ദൂഷ്യഫലങ്ങളും വിശദീകരിച്ച് ബോധവത്കരണ സന്ദേശവും നൽകി.
