മൈസൂരു ജില്ലയിലെ ഗുണ്ടൽപേട്ട് താലൂക്കിലെ കാളിഗൗഡനഹള്ളിയിൽ നാല് വയസ്സുകാരി വൈദ്യുതാഘാതമേറ്റ് മരിച്ചു. പുട്ടമ്മ-ആനന്ദ് ദമ്പതികളുടെ മകളായ അദ്വിതയാണ് വീട്ടിനുള്ളിലുണ്ടായ അപകടത്തിൽ മരിച്ചത്.
ബുധനാഴ്ച ഉച്ചയോടെയായിരുന്നു സംഭവം. വീട്ടിൽ കളിച്ചുകൊണ്ടിരുന്ന അദ്വിത വെള്ളം കുടിക്കാൻ അടുക്കളയിലേക്ക് പോയപ്പോൾ അപകടം സംഭവിക്കുകയായിരുന്നു. ഈ സമയം അടുക്കളയിൽ മാവ് അരയ്ക്കുന്നതിനായി ഗ്രൈൻഡർ പ്രവർത്തനസജ്ജമായി വെച്ചിരുന്നതായി കുടുംബാംഗങ്ങൾ അറിയിച്ചു.
അബദ്ധത്തിൽ ഗ്രൈൻഡറിൽ സ്പർശിച്ചതോടെ കുട്ടിക്ക് ശക്തമായ വൈദ്യുതാഘാതമേൽക്കുകയായിരുന്നു. അപകടം ശ്രദ്ധയിൽപ്പെട്ട ഉടൻ തന്നെ വീട്ടുകാരും നാട്ടുകാരും ചേർന്ന് സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിലെത്തുമ്പോഴേക്കും കുട്ടി മരിച്ചതായി ഡോക്ടർമാർ സ്ഥിരീകരിച്ചു.
സംഭവത്തിൽ പ്രാദേശിക പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. സുരക്ഷാ മുൻകരുതലുകളുടെ അഭാവമാണോ അപകടത്തിന് കാരണമായതെന്ന് ഉൾപ്പെടെ വിവിധ കാര്യങ്ങൾ പരിശോധിച്ചുവരികയാണ്.
