സംസ്ഥാനത്ത് നിലവിൽ ഊർജ പ്രതിസന്ധിയുണ്ടെന്ന് മുഖ്യമന്ത്രി വി.ഡി. സതീശൻ. വൈദ്യുതി പ്രതിസന്ധിക്ക് വ്യക്തമായ കാരണങ്ങളുണ്ടെന്നും സമഗ്രമായ വൈദ്യുതി പദ്ധതി നടപ്പാക്കി പ്രശ്നം നിയന്ത്രിക്കുന്നതിനൊപ്പം ശാശ്വത പരിഹാരം കണ്ടെത്താനും കഴിയുമെന്നും അദ്ദേഹം പറഞ്ഞു. പ്രതിസന്ധിയെ പ്രശ്നപരിഹാരത്തിനുള്ള അവസരമായി കാണണമെന്നും മുഖ്യമന്ത്രി വ്യക്തമാക്കി.
കഴിഞ്ഞ വർഷത്തെ അപേക്ഷിച്ച് കേരളത്തിലെ വൈദ്യുതി ആവശ്യകതയിൽ വലിയ വർധനയുണ്ടായതാണ് പ്രധാന വെല്ലുവിളിയെന്ന് സതീശൻ പറഞ്ഞു. നിലവിൽ രാജ്യത്തിൻ്റെ വിവിധ ഭാഗങ്ങളിൽ നിന്ന് പോലും ആവശ്യമായ അളവിൽ വൈദ്യുതി വാങ്ങാൻ കഴിയാത്ത സാഹചര്യമാണ്. ജലവൈദ്യുത പദ്ധതികൾ വഴി ഉടൻ കൂടുതൽ വൈദ്യുതി ഉൽപ്പാദിപ്പിക്കുക സാധ്യമല്ലാത്തതിനാൽ പുനരുപയോഗ, ഇതര ഊർജസ്രോതസ്സുകളിലേക്ക് കൂടുതൽ ശ്രദ്ധ നൽകേണ്ടതുണ്ടെന്നും അദ്ദേഹം പറഞ്ഞു.
ഒക്ടോബറിൽ പ്രഖ്യാപിക്കുന്ന പുതിയ വൈദ്യുതി നയത്തിൽ സൗരോർജത്തിന് പ്രധാന സ്ഥാനം നൽകും. പുതിയ വൈദ്യുതി റെഗുലേറ്ററി പോളിസിയും ഈ മാസം തന്നെ കൊണ്ടുവരുമെന്നും മുഖ്യമന്ത്രി അറിയിച്ചു.
പുനരുപയോഗ ഊർജ രംഗത്തേക്ക് കൂടുതൽ കടന്നുവരുന്നതിൽ ചിലർക്ക് താൽപര്യമില്ലെന്ന വിമർശനവും സതീശൻ ഉന്നയിച്ചു. പ്രതിസന്ധി രൂക്ഷമാകാൻ ഇടയാക്കുന്ന തരത്തിൽ ചിലയിടങ്ങളിൽ അനാവശ്യമായി പലതവണ വൈദ്യുതി വിച്ഛേദിക്കുന്ന സാഹചര്യമുണ്ടെന്നും അദ്ദേഹം ആരോപിച്ചു.
വൈദ്യുതി പ്രതിസന്ധിയുടെ ഉത്തരവാദിത്തം മറ്റാരുടെയും തലയിൽ കെട്ടിവയ്ക്കില്ലെന്നും സർക്കാർ തന്നെ ഉത്തരവാദിത്തം ഏറ്റെടുക്കുമെന്നും മുഖ്യമന്ത്രി വ്യക്തമാക്കി. വൈദ്യുതി രംഗത്ത് സ്വയംപര്യാപ്തത കൈവരിക്കുകയാണ് പ്രതിസന്ധിക്ക് ദീർഘകാല പരിഹാരമെന്നും അദ്ദേഹം പറഞ്ഞു. കൊച്ചിയിൽ കെഎസ്ഇബി സംഘടിപ്പിച്ച എക്സ്പോയിൽ സംസാരിക്കുകയായിരുന്നു മുഖ്യമന്ത്രി.
