ഓൺലൈനായി ഓർഡർ ചെയ്ത സാധനങ്ങൾ എത്തിക്കാനെത്തിയ ഡെലിവറി ഏജന്റ് വീട്ടിൽ അതിക്രമിച്ച് കയറി യുവതിയോട് അപമര്യാദയായി പെരുമാറിയെന്ന പരാതിയിൽ ബെംഗളൂരു പൊലീസ് അന്വേഷണം ആരംഭിച്ചു. ഇന്നലെ റിപ്പോർട്ട് ചെയ്ത സംഭവത്തിൽ പ്രതിക്കെതിരെ കേസെടുത്ത് അന്വേഷണം ഊർജിതമാക്കിയതായി പൊലീസ് അറിയിച്ചു.
പരാതിക്കാരിയുടെ മൊഴിപ്രകാരം, ഡെലിവറി പൂർത്തിയാക്കിയ ശേഷം ശുചിമുറി ഉപയോഗിക്കണമെന്ന് ആവശ്യപ്പെട്ട ഏജന്റ് അനുവാദമില്ലാതെ ബലമായി വീട്ടിനുള്ളിലേക്ക് കടക്കുകയായിരുന്നു. തുടർന്ന് വീട്ടിനുള്ളിൽവച്ച് യുവതിയോട് അപമര്യാദയായി പെരുമാറുകയും നഗ്നത പ്രദർശിപ്പിക്കുകയും ചെയ്തതായാണ് പരാതി.
യുവതിയുടെ നിലവിളി കേട്ട് സമീപവാസികൾ ഓടിയെത്തിയതോടെ പ്രതി സ്ഥലത്തുനിന്ന് രക്ഷപ്പെടുകയായിരുന്നു. തുടർന്ന് യുവതി പൊലീസിൽ പരാതി നൽകുകയും കേസെടുത്ത് അന്വേഷണം ആരംഭിക്കുകയും ചെയ്തു.
“ഞാൻ വല്ലാതെ ഭയന്നുപോയിരുന്നു. സുരക്ഷയെക്കുറിച്ച് ആശങ്കയുണ്ടായിരുന്നതിനാൽ, ഫോൺ ക്യാമറ ഓണാക്കി വെക്കുകയും പ്രധാന വാതിൽ തുറന്നിടുകയും ചെയ്തുകൊണ്ട് ഞാൻ വാതിലിനടുത്ത് നിന്നു; എന്തെങ്കിലും സംഭവിച്ചാൽ സഹായത്തിനായി പുറത്തേക്ക് ഓടാമല്ലോ എന്ന് കരുതിയായിരുന്നു അത്. സ്ത്രീകൾക്കെതിരായ ബലാത്സംഗക്കുറ്റങ്ങളെക്കുറിച്ച് നമ്മൾ ദിവസവും കേൾക്കാറുണ്ടല്ലോ,” യുവതി കൂട്ടിച്ചേർത്തു.
സംഭവത്തെ തുടർന്ന് ഡെലിവറി സേവനങ്ങളിലെ സുരക്ഷാ മാനദണ്ഡങ്ങളെക്കുറിച്ച് വ്യാപകമായ ചർച്ചയാണ് ഉയരുന്നത്. ജീവനക്കാരുടെ പശ്ചാത്തല പരിശോധന കൂടുതൽ കർശനമാക്കണമെന്നും, ഉപഭോക്താക്കളുടെ സുരക്ഷ ഉറപ്പാക്കാൻ കമ്പനികൾ ശക്തമായ സുരക്ഷാ സംവിധാനങ്ങൾ നടപ്പാക്കണമെന്നും ആവശ്യങ്ങൾ ഉയർന്നിട്ടുണ്ട്.
ഡെലിവറി സ്ഥാപനത്തിൽ നിന്ന് ജീവനക്കാരൻ്റെ വിവരങ്ങളും ഡെലിവറി രേഖകളും പൊലീസ് ശേഖരിച്ചുവരികയാണ്. സിസിടിവി ദൃശ്യങ്ങൾ ഉൾപ്പെടെയുള്ള തെളിവുകൾ പരിശോധിച്ച് പ്രതിയെ ഉടൻ കണ്ടെത്താനാകുമെന്നാണ് അന്വേഷണസംഘത്തിൻ്റെ പ്രതീക്ഷ.
