ആംആദ്മി പാര്‍ട്ടി നേതാവ് അരവിന്ദ് കെജ്‌രിവാളും മുൻ ഉപമുഖ്യമന്ത്രി മനീഷ് സിസോദിയയും ഡൽഹി മദ്യനയ അഴിമതിക്കേസില്‍ കുറ്റവിമുക്തരായി. പ്രതിപ്പട്ടികയില്‍ നിന്നും കെജ്‌രിവാളിനെയും മനീഷ് സിസോദിയെയും ഒഴിവാക്കി. പ്രോസിക്യൂഷൻ ഉന്നയിച്ച ആരോപണങ്ങൾ വിശ്വസനീയമായ തെളിവുകൾ ഉപയോഗിച്ച് സ്ഥാപിക്കുന്നതിൽ സിബിഐ പരാജയപ്പെട്ടുവെന്ന് കോടതി നിരീക്ഷിച്ചു.
ക്രിമിനൽ ഉദ്ദേശ്യവും ഗൂഢാലോചനയും സംബന്ധിച്ച വാദങ്ങൾ ജുഡീഷ്യൽ പരിശോധനയിൽ നിലനിൽക്കുന്നതല്ലെന്നും, രേഖയിലുള്ള വിവരങ്ങൾ കേവലം ഭരണപരമായ തീരുമാനങ്ങൾ മാത്രമാണെന്നും കോടതി വ്യക്തമാക്കി. തെളിവുകളുടെ അഭാവം പ്രതികൾക്കെതിരെ ഉണ്ടെന്ന് ചൂണ്ടിക്കാട്ടിയ കോടതി, സിബിഐയുടെ അന്വേഷണ രീതികളെ കടുത്ത ഭാഷയിൽ വിമർശിച്ചു.
ശരിയായ രേഖകളില്ലാതെ കേന്ദ്ര ഗൂഢാലോചന ആരോപിക്കുന്നത് നിയമപരമായി നിലനിൽക്കില്ലെന്നും ഗുരുതരമായ ആരോപണങ്ങൾ തെളിവുകളുടെ അടിസ്ഥാനത്തിൽ സ്ഥിരീകരിക്കേണ്ടതുണ്ടെന്നും, വിധിന്യായത്തിൽ പറയുന്നു. കേജ്‌രിവാളിനെയും സിസോദിയയെയും ഉൾപ്പെടെ കേസിൽ ഉൾപ്പെട്ട 23 പ്രതികളെയും ഡൽഹി റൗസ് അവന്യൂ കോടതി സ്പെഷ്യൽ ജഡ്ജി കുറ്റവിമുക്തരാക്കിക്കൊണ്ടാണ് വിധിയിറക്കിയത്.
പ്രോസിക്യൂഷൻ വാദങ്ങൾക്ക് തെളിവുകളുടെ പിന്തുണയില്ലാതെ വരുന്നത് ഭരണഘടനാ സ്ഥാപനങ്ങളിലുള്ള പൊതുജനവിശ്വാസത്തെ ബാധിക്കുമെന്നും കോടതി ഓർമ്മിപ്പിച്ചു. മനീഷ് സിസോദിയയുടെ ഭാഗത്തുനിന്നും ക്രിമിനൽ ഉദ്ദേശ്യം സൂചിപ്പിക്കുന്ന ഒരു തെളിവും കണ്ടെത്താൻ അന്വേഷണ ഏജൻസിക്ക് സാധിച്ചിട്ടില്ല.
