എസ്‌എഫ്‌ഐ–യുഡിഎസ്‌എഫ് പ്രവർത്തകർ തമ്മിൽ സംഘർഷമുണ്ടായതിനെ തുടർന്ന് കാലിക്കറ്റ് സർവകലാശാല ക്യാമ്പസിലെ പഠനവകുപ്പുകൾ നവംബർ 2 വരെ അടച്ചിടാൻ തീരുമാനിച്ചു. വിദ്യാർഥികൾ ഹോസ്റ്റലുകൾ ഒഴിഞ്ഞുപോകണമെന്നും സർവകലാശാല രജിസ്ട്രാർ നിർദേശം നൽകി.
ബുധനാഴ്ച നടന്ന ഡിപ്പാർട്ട്‌മെന്റൽ സ്റ്റുഡന്റ്സ് യൂണിയൻ തിരഞ്ഞെടുപ്പിനിടെയാണ് ക്യാമ്പസിൽ സംഘർഷമുണ്ടായത്. തിരഞ്ഞെടുപ്പുമായി ബന്ധപ്പെട്ട തർക്കം പിന്നീട് എസ്‌എഫ്‌ഐ–യുഡിഎസ്‌എഫ് പ്രവർത്തകർ തമ്മിലുള്ള ഏറ്റുമുട്ടലിലേക്ക് നീങ്ങുകയായിരുന്നു.
സംഘർഷത്തിൻ്റെ പശ്ചാത്തലത്തിൽ ക്യാമ്പസിലെ സാഹചര്യം നിയന്ത്രിക്കുന്നതിൻ്റെ ഭാഗമായാണ് പഠനവകുപ്പുകൾ അടച്ചിടാനും വിദ്യാർഥികളോട് ഹോസ്റ്റലുകൾ ഒഴിയാനും നിർദേശിച്ചതെന്നാണ് റിപ്പോർട്ട്. നവംബർ 2 വരെ പഠനവകുപ്പുകളുടെ പ്രവർത്തനം നിർത്തിവയ്ക്കും.
