ബംഗളൂരു മുനിസിപ്പൽ തെരഞ്ഞെടുപ്പിൽ ഇലക്ട്രോണിക് വോട്ടിങ് മെഷീനുകൾക്ക് പകരം ബാലറ്റ് പേപ്പറുകൾ ഉപയോഗിക്കുന്നതിനെതിരെ മുൻ ബംഗളൂരു റൂറൽ എം.പിയും കോണ്‍ഗ്രസ് നേതാവും ഉപ മുഖ്യമന്ത്രി ഡി.കെ. ശിവകുമാറിന്‍റെ സഹോദരനുമായ ഡി.കെ. സുരേഷ്. ഗ്രേറ്റർ ബംഗളൂരു അതോറിറ്റിയുടെ (ജി.ബി.എ) കീഴിലുള്ള അഞ്ച് മുനിസിപ്പൽ കോർപറേഷനുകളിലേക്കുള്ള തെരഞ്ഞെടുപ്പുകൾക്ക് ബാലറ്റ് പേപ്പറുകൾ ഉപയോഗിക്കുമെന്ന് സംസ്ഥാന തെരഞ്ഞെടുപ്പ് കമ്മീഷൻ (എസ്.ഇ.സി) അറിയിച്ചതിനെത്തുടര്‍ന്നാണ് ഡി.കെ. സുരേഷിന്‍റെ പ്രതികരണം.
‘ഇ.വി.എമ്മുകളിൽ വിശ്വാസക്കുറവുണ്ട്. ബാലറ്റ് പേപ്പറില്‍ നിന്ന് ഒരുപടി മുന്നോട്ടു വെച്ചപ്പോള്‍ സംസ്ഥാന സര്‍ക്കാര്‍ ഒരു പടി പിന്നോട്ട് വെക്കുന്നത് ശരിയോ തെറ്റോ എന്ന് ഹൈകമാൻഡ് തീരുമാനിക്കണമെന്നും ബാംഗ്ലൂർ മിൽക്ക് യൂണിയൻ ലിമിറ്റഡ് പ്രസിഡന്‍റ് കൂടിയായ സുരേഷ് പറഞ്ഞു. എസ്.ഇ.സിയുടെയും സംസ്ഥാന സർക്കാറിന്‍റെയും മേൽനോട്ടത്തിലായിരിക്കും മുനിസിപ്പൽ തെരഞ്ഞെടുപ്പ് നടക്കുക. അതിനാൽ ഇതിൽ ആർക്കും കൃത്രിമം കാണിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
