അമ്പതാമത് വയലാർ സാഹിത്യ പുരസ്കാരം ആർ. രാജശ്രീയുടെ ‘ആത്രേയകം’ എന്ന നോവലിന്. ഒരു ലക്ഷം രൂപയും ശിൽപവും പ്രശസ്തിപത്രവും അടങ്ങുന്നതാണ് പുരസ്കാരം. വയലാർ രാമവർമ മെമ്മോറിയൽ ട്രസ്റ്റാണ് പുരസ്കാരം പ്രഖ്യാപിച്ചത്.
ഒ.വി. ഉഷ, സുഭാഷ് ചന്ദ്രൻ, വി. വിജയകുമാർ എന്നിവരടങ്ങിയ ജൂറിയാണ് പുരസ്കാര ജേതാവിനെ തിരഞ്ഞെടുത്തത്. സമകാലിക മലയാള സാഹിത്യത്തിൽ ഏറെ ചർച്ച ചെയ്യപ്പെട്ട കൃതികളിലൊന്നാണ് ‘ആത്രേയകം’.
പുരസ്കാര നേട്ടത്തിൽ ഏറെ സന്തോഷമുണ്ടെന്ന് ആർ. രാജശ്രീ പ്രതികരിച്ചു. എഴുത്ത് നിർത്തിയശേഷം വീണ്ടും സാഹിത്യരംഗത്തേക്ക് തിരിച്ചുവന്ന വ്യക്തിയാണ് താനെന്നും തന്നെപ്പോലുള്ളവർക്ക് രണ്ടാമൂഴം ഉണ്ടെന്നതിന്റെ തെളിവാണ് ഈ പുരസ്കാരമെന്നും അവർ പറഞ്ഞു.
കണ്ണൂർ ജില്ലയിലെ പറശ്ശിനിക്കടവിൽ ജനിച്ച ആർ. രാജശ്രീ, ‘കല്യാണിയെന്നും ദാക്ഷായിണിയെന്നും പേരായ രണ്ട് സ്ത്രീകളുടെ കത’ എന്ന നോവലിലൂടെയാണ് ശ്രദ്ധേയയായത്. ഈ കൃതിക്ക് 2021ലെ കേരള സാഹിത്യ അക്കാദമി പുരസ്കാരം ലഭിച്ചിരുന്നു.
‘നായികാ നിർമിതി’, ‘വഴിയും പൊരുളും’, ‘അപസർപ്പകാഖ്യാനങ്ങൾ: ഭാവനയും രാഷ്ട്രീയവും’, ‘കൃഷ്ണനുവേണ്ടിയുണ്ടായ പെണ്ണുങ്ങൾ’ എന്നിവയാണ് മറ്റ് പ്രധാന കൃതികൾ.
ഈ മാസം 27ന് തിരുവനന്തപുരത്തെ നിശാഗന്ധി ഓഡിറ്റോറിയത്തിൽ നടക്കുന്ന ചടങ്ങിൽ മുഖ്യമന്ത്രി വി.ഡി. സതീശൻ പുരസ്കാരം സമ്മാനിക്കും.
