കണ്ണമ്മൂല വിഷ്ണു വധക്കേസിൽ ഏഴ് പ്രതികൾക്കും ജീവപര്യന്തം തടവും പിഴയും വിധിച്ച് നെടുമങ്ങാട് എസ്‌സി/എസ്‌ടി പ്രത്യേക കോടതി. അരുൺ, ലല്ലു, രാജേഷ്, സനൽകുമാർ, ശ്രീനാഥ്, വിജീഷ്, മനു എന്നിവർക്കാണ് ശിക്ഷ.
2016 ഒക്ടോബർ 7നായിരുന്നു കേസിനാസ്പദമായ സംഭവം. മാതാപിതാക്കളുടെ മുന്നിൽവെച്ച് സംഘം ചേർന്ന് വിഷ്ണുവിനെ വെട്ടിക്കൊലപ്പെടുത്തുകയായിരുന്നു. അന്ന് 18 വയസായിരുന്നു വിഷ്ണുവിന്. ആക്രമണം തടയാൻ ശ്രമിക്കുന്നതിനിടെ വിഷ്ണുവിൻ്റെ അമ്മയ്ക്കും അച്ഛൻ്റെ സഹോദരിക്കും ഗുരുതരമായി പരിക്കേറ്റിരുന്നു.
കേസിൽ ആകെ 12 പ്രതികളാണുണ്ടായിരുന്നത്. ഇതിൽ ഏഴ് പേരെയാണ് കോടതി കുറ്റക്കാരായി കണ്ടെത്തി ശിക്ഷിച്ചത്. നാല് പേരെ വെറുതെവിട്ടു. മറ്റൊരു പ്രതി നേരത്തെ മരിച്ചിരുന്നു.
പ്രതികൾ ഓരോരുത്തരും 1.75 ലക്ഷം രൂപ വീതം പിഴ അടയ്ക്കണമെന്നും കോടതി ഉത്തരവിട്ടിട്ടുണ്ട്. പിഴത്തുകയിൽ നിന്ന് വിഷ്ണുവിൻ്റെ അമ്മയ്ക്ക് അഞ്ച് ലക്ഷം രൂപയും, കേസിലെ രണ്ട് സാക്ഷികൾക്ക് മൂന്ന് ലക്ഷം രൂപ വീതവും നൽകാൻ നിർദേശമുണ്ടെന്ന് റിപ്പോർട്ടുകൾ വ്യക്തമാക്കുന്നു.
പ്രോസിക്യൂഷൻ പ്രകാരം, മുൻ വൈരാഗ്യമാണ് കൊലപാതകത്തിന് പിന്നിലെ കാരണം. പ്രതികളിലൊരാളുടെ സഹോദരനായ സുനി ബാബുവിൻ്റെ കൊലപാതകവുമായി ബന്ധപ്പെട്ട് വിഷ്ണുവിൻ്റെ ബന്ധുക്കൾക്ക് ഉണ്ടായിരുന്ന അടുപ്പമാണ് പിന്നീട് വൈരാഗ്യത്തിലേക്ക് നയിച്ചതെന്നാണ് കേസ്.
