ഇഡി ഉദ്യോഗസ്ഥരെ ആക്രമിച്ച കേസിൽ ഏഴ് പ്രതികൾക്ക് കർശന ഉപാധികളോടെ കേരള ഹൈക്കോടതി ജാമ്യം അനുവദിച്ചു. ജസ്റ്റിസ് കൗസർ എടപ്പഗത്ത് അധ്യക്ഷനായ സിംഗിൾ ബെഞ്ചാണ് ഉത്തരവ് പുറപ്പെടുവിച്ചത്.
കിരൺ പി.എസ്, ജീവൻ, അനിൽ കുമാർ, ശ്രീജിത്ത്, നിഷാദ്, സിദ്ധാർഥ് എസ്., ഷെഫീഖ് എന്നിവർക്കാണ് ജാമ്യം ലഭിച്ചത്. തിരുവനന്തപുരം പ്രിൻസിപ്പൽ സെഷൻസ് കോടതി ജാമ്യം നിഷേധിച്ചതിനെ തുടർന്നാണ് പ്രതികൾ ഹൈക്കോടതിയെ സമീപിച്ചത്.
കേസിലെ കുറ്റാരോപണങ്ങൾ ഗൗരവമുള്ളതാണെന്ന് കോടതി നിരീക്ഷിച്ചെങ്കിലും, പ്രതികൾ 67 ദിവസം കസ്റ്റഡിയിൽ കഴിഞ്ഞ സാഹചര്യവും മറ്റ് നിയമപരമായ വസ്തുതകളും പരിഗണിച്ചാണ് ജാമ്യം അനുവദിച്ചത്. അതേസമയം, പ്രതികൾക്ക് ജാമ്യം അനുവദിക്കരുതെന്ന നിലപാടാണ് എൻഫോഴ്‌സ്‌മെന്റ് ഡയറക്ടറേറ്റ് (ഇഡി) കോടതിയിൽ സ്വീകരിച്ചത്.
ആകെ 11 പ്രതികളാണ് ഹൈക്കോടതിയിൽ അപ്പീൽ നൽകിയിരുന്നത്. ഇവരിൽ ഏഴ് പേർക്കാണ് ജാമ്യം ലഭിച്ചത്. അറസ്റ്റ് നടപടിക്രമങ്ങൾ പാലിച്ചല്ല നടത്തിയതെന്നും, തങ്ങൾക്കെതിരെ നേരിട്ടുള്ള തെളിവുകളില്ലെന്നും, മാധ്യമ ദൃശ്യങ്ങളുടെ അടിസ്ഥാനത്തിലാണ് അറസ്റ്റ് നടത്തിയതെന്നുമാണ് പ്രതികളുടെ വാദം. കൊലപാതകശ്രമം ഉൾപ്പെടെയുള്ള വകുപ്പുകൾ ചുമത്തിയത് അനാവശ്യമാണെന്നും ഹർജിയിൽ ചൂണ്ടിക്കാട്ടിയിരുന്നു.
പ്രതിപക്ഷ നേതാവ് പിണറായി വിജയൻ്റെ മകൾ വീണയുടെ വസതിയിൽ ഇഡി പരിശോധന നടത്തുന്നതിനിടെയുണ്ടായ ആക്രമണമാണ് കേസിന് ആധാരം. സംഭവവുമായി ബന്ധപ്പെട്ട് 25 പേരെ അറസ്റ്റ് ചെയ്തിരുന്നു. ഇവരിൽ ഭൂരിഭാഗം പേരുടെയും ജാമ്യാപേക്ഷ പ്രിൻസിപ്പൽ സെഷൻസ് കോടതി നേരത്തെ തള്ളിയിരുന്നു.
