അമ്മമാർ മകൻ്റെ ഭാര്യയ്ക്ക് പരമ്പരാഗത ഭക്ഷണരീതികൾ പഠിപ്പിക്കണമെന്ന പരാമർശം സ്ത്രീ വിരുദ്ധമാണെന്ന വിമർശനങ്ങൾക്കിടെ വിശദീകരണവുമായി മുഖ്യമന്ത്രി വി.ഡി. സതീശൻ. താൻ സ്ത്രീ വിരുദ്ധ പരാമർശമൊന്നും നടത്തിയിട്ടില്ലെന്നും പറഞ്ഞ കാര്യങ്ങളിൽ ഉറച്ചുനിൽക്കുന്നുവെന്നും അദ്ദേഹം വ്യക്തമാക്കി.
വാർത്താസമ്മേളനത്തിൽ സംസാരിക്കവെ, പെൺമക്കൾക്ക് മാത്രമല്ല, എല്ലാ മക്കൾക്കും കുടുംബത്തിൻ്റെ അറിവുകളും പാരമ്പര്യങ്ങളും കൈമാറണമെന്ന അർഥത്തിലാണ് താൻ സംസാരിച്ചതെന്ന് മുഖ്യമന്ത്രി പറഞ്ഞു. തൻ്റെ പ്രസ്താവന തെറ്റായി വ്യാഖ്യാനിച്ച് അനാവശ്യ വിവാദമുണ്ടാക്കുകയാണെന്നും അദ്ദേഹം കൂട്ടിച്ചേർത്തു.
കഴിഞ്ഞ ദിവസം നടന്ന ഒരു ചടങ്ങിൽ പരമ്പരാഗത പാചകരീതികളും കലകളും അടുത്ത തലമുറയിലേക്ക് കൈമാറേണ്ടതിൻ്റെ പ്രാധാന്യം ചൂണ്ടിക്കാട്ടുന്നതിനിടെയാണ് മുഖ്യമന്ത്രിയുടെ പരാമർശം. ചില അമ്മമാർ പ്രത്യേക വിഭവങ്ങൾ തയ്യാറാക്കുന്നുണ്ടെങ്കിലും അതിൻ്റെ രീതി മക്കൾക്കോ കുടുംബത്തിലേക്ക് പുതുതായി എത്തുന്നവർക്കോ പഠിപ്പിക്കാറില്ലെന്നായിരുന്നു അദ്ദേഹത്തിൻ്റെ പരാമർശം.
എന്നാൽ, മകൻ്റെ ഭാര്യയെ മാത്രം പരാമർശിച്ചത് ലിംഗവിവേചനപരമാണെന്നും പാചകം സ്ത്രീകളുടെ മാത്രം ഉത്തരവാദിത്വമായി ചിത്രീകരിക്കുന്ന സമീപനമാണെന്നുമാണ് സാമൂഹിക മാധ്യമങ്ങളിലുൾപ്പെടെ വിമർശനം ഉയർന്നത്. ഇതിന് പിന്നാലെയാണ് മുഖ്യമന്ത്രിയുടെ വിശദീകരണം.
