കർണാടകയിലെ പ്രത്യേക വോട്ടർ പട്ടിക പുനഃപരിശോധന (എസ് ഐ ആർ) നടപടിക്കിടെ 79.75 ലക്ഷത്തിലധികം വോട്ടർമാരെ ASDDO (Absent, Shifted, Dead, Duplicate and Others) വിഭാഗത്തിൽ ഉൾപ്പെടുത്തിയതായി റിപ്പോർട്ടുകൾ. ഇതിൽ സ്ഥിരതാമസം മാറിയവർ, മരിച്ചവർ, ഇരട്ട രജിസ്ട്രേഷനുള്ളവർ, കണ്ടെത്താനാകാത്തവർ, മറ്റ് കാരണങ്ങളാൽ സംശയാസ്പദമായി കണ്ടെത്തിയവർ എന്നിവരാണ് ഉൾപ്പെടുന്നത്.
സംസ്ഥാനത്തെ 5.5 കോടിയിലധികം വോട്ടർമാരുടെ വിവരങ്ങൾ പുതുക്കുന്നതിനായാണ് തിരഞ്ഞെടുപ്പ് കമ്മീഷൻ പ്രത്യേക പരിശോധന നടത്തുന്നത്. ഇതിനായി 59,000-ത്തിലധികം ബൂത്ത് ലെവൽ ഓഫീസർമാർ (BLO) വീടുകൾ സന്ദർശിച്ച് വിവരശേഖരണം നടത്തി. കരട് വോട്ടർ പട്ടിക പ്രസിദ്ധീകരിക്കുന്നതിന് മുമ്പ് അർഹരായ വോട്ടർമാരുടെ വിവരങ്ങൾ കൃത്യമായി ഉറപ്പാക്കുകയാണ് ലക്ഷ്യം.
ASDDO വിഭാഗത്തിൽ ഉൾപ്പെട്ടവരുടെ പേരുകൾ കരട് വോട്ടർ പട്ടികയിൽ നിന്ന് ഒഴിവാക്കാൻ തിരഞ്ഞെടുപ്പ് കമ്മീഷൻ നിർദേശം നൽകിയിട്ടുണ്ട്. എന്നാൽ ജീവനോടെയുള്ള ചിലരെ ‘മരിച്ചവർ’ എന്ന വിഭാഗത്തിലും മറ്റ് അർഹരായ വോട്ടർമാരെ ‘സ്ഥിരതാമസം മാറിയവർ’ എന്ന വിഭാഗത്തിലും തെറ്റായി ഉൾപ്പെടുത്തിയെന്ന പരാതികളും വിവിധ ഭാഗങ്ങളിൽ നിന്ന് ഉയർന്നിട്ടുണ്ട്. ഇതുമായി ബന്ധപ്പെട്ട് കർണാടക ഹൈക്കോടതിയിലും ഹർജികൾ പരിഗണനയിലാണ്.
രാഷ്ട്രീയ പാർട്ടികൾക്കും പൊതുജനങ്ങൾക്കും ASDDO പട്ടിക പരിശോധിച്ച് തെറ്റുകൾ കണ്ടെത്തിയാൽ അധികൃതരെ അറിയിക്കാൻ മുഖ്യ തിരഞ്ഞെടുപ്പ് ഓഫീസർ അഭ്യർഥിച്ചിട്ടുണ്ട്. പരിശോധനയ്ക്കുശേഷം പരാതികൾ പരിഗണിച്ച് അന്തിമ വോട്ടർ പട്ടിക പ്രസിദ്ധീകരിക്കും.
