അഞ്ചരക്കണ്ടി ഡെന്റൽ കോളേജ് വിദ്യാർഥി നിതിൻ രാജിൻ്റെ മരണവുമായി ബന്ധപ്പെട്ട കേസിൽ പ്രധാന പ്രതിയായ ഡോ. റാമിനെ ക്രൈംബ്രാഞ്ച് വീണ്ടും അറസ്റ്റ് ചെയ്തു. തലശ്ശേരി എസ്.സി/എസ്.ടി പ്രത്യേക കോടതി അനുമതി നൽകിയതിനെ തുടർന്നാണ് നടപടി.
കഴിഞ്ഞ ദിവസം ക്രൈംബ്രാഞ്ച് ഇൻസ്പെക്ടർ ശ്രീജിത് കൊടേരിയുടെ നേതൃത്വത്തിലുള്ള അന്വേഷണസംഘം ഡോ. റാമിനെ കസ്റ്റഡിയിലെടുത്തിരുന്നു. എന്നാൽ, അറസ്റ്റ് നടപടിക്രമങ്ങൾ പാലിച്ചില്ലെന്ന് കോടതി കണ്ടെത്തിയതിനെ തുടർന്ന് അദ്ദേഹത്തെ വിട്ടയക്കുകയായിരുന്നു. തുടർന്ന് നിയമനടപടികൾ പൂർത്തിയാക്കി നോട്ടീസ് നൽകിയ ശേഷമാണ് ക്രൈംബ്രാഞ്ച് വീണ്ടും അറസ്റ്റ് രേഖപ്പെടുത്തിയത്.
നിതിൻ രാജ് ആത്മഹത്യ ചെയ്തതിന് മൂന്ന് മാസത്തിന് ശേഷമാണ് കേസിലെ മുഖ്യപ്രതി അറസ്റ്റിലാകുന്നത്. മരണത്തിലേക്ക് നയിച്ച സാഹചര്യങ്ങളെക്കുറിച്ചും പ്രതിയുടെ പങ്കിനെക്കുറിച്ചും കൂടുതൽ തെളിവുകൾ ശേഖരിക്കാൻ ക്രൈംബ്രാഞ്ച് അന്വേഷണം തുടരുകയാണ്.
കേസിൻ്റെ തുടർനടപടികൾക്കായി പ്രതിയെ കോടതിയിൽ ഹാജരാക്കും. അന്വേഷണത്തിൻ്റെ ഭാഗമായി കൂടുതൽ പേരുടെ മൊഴിയും ഡിജിറ്റൽ തെളിവുകളും പരിശോധിച്ചുവരികയാണെന്ന് അന്വേഷണ ഉദ്യോഗസ്ഥർ അറിയിച്ചു.
