ബെംഗളൂരുവിൽ വാട്ടർ ടാങ്കിന് മുകളിൽ കയറി ആത്മഹത്യാഭീഷണി മുഴക്കിയ മലയാളി യുവതിയെയും നാല് വയസ്സുള്ള മകനെയും പൊലീസ് സുരക്ഷിതമായി താഴെയിറക്കി. ദൊഡ്ഡകനാലി മേഖലയിലായിരുന്നു സംഭവം.
കുടുംബപ്രശ്നം പരിഹരിക്കണമെന്നാവശ്യപ്പെട്ടാണ് യുവതി മകനുമായി വാട്ടർ ടാങ്കിന് മുകളിൽ കയറി ആത്മഹത്യാഭീഷണി മുഴക്കിയത്. വിവരം ലഭിച്ചതോടെ ഹുളിമാവ് പോലീസ് ഇൻസ്പെക്ടർ ജഗദീഷിൻ്റെ നേതൃത്വത്തിൽ എത്തിയ പോലീസ് സംഘം ദീർഘനേരത്തെ കൗൺസിലിംഗിനും ചർച്ചകൾക്കും ഒടുവിൽ അദ്ദേഹം ആ സ്ത്രീയെ താഴെയിറങ്ങാൻ പ്രേരിപ്പിച്ചു. പൊലീസ് സ്ഥലത്തെത്തി നടത്തിയ അനുനയ ശ്രമങ്ങൾക്കൊടുവിലാണ് ഇരുവരെയും സുരക്ഷിതമായി താഴെയിറക്കിയത്.
മുതിർന്ന ഉദ്യോഗസ്ഥരുമായി കേസിനെക്കുറിച്ച് ചർച്ച ചെയ്യുമെന്നും സ്ത്രീക്ക് കൗൺസിലിംഗ് നൽകാൻ ക്രമീകരണങ്ങൾ ചെയ്യുമെന്നും പോലീസ് അറിയിച്ചു. താൻ ഇത്തരത്തിൽ പെരുമാറാനുണ്ടായ കൃത്യമായ കാരണം അവർ വെളിപ്പെടുത്തിയിട്ടില്ലെന്ന് പോലീസ് പറഞ്ഞു.
നേരത്തെ പല കേസുകളും ഫയൽ ചെയ്തിട്ടുള്ള ഇവർ ഭർത്താവുമായി വേർപിരിഞ്ഞ്, വാടക വീട്ടിൽ മകനോടൊപ്പമാണ് താമസിച്ചിരുന്നതെന്ന് പ്രാഥമിക അന്വേഷണത്തിൽ വ്യക്തമായി. യുവതിയെയും കുട്ടിയെയും സുരക്ഷിത സ്ഥലത്തേക്ക് മാറ്റിയ പൊലീസ് സംഭവത്തിൽ കൂടുതൽ അന്വേഷണം ആരംഭിച്ചു.
