ലോക ബുള്ളറ്റ് ചെസ് ചാംപ്യൻഷിപ്പിൽ ചരിത്രം കുറിച്ച് മലയാളി ഗ്രാൻഡ്‌മാസ്റ്റർ നിഹാൽ സരിൻ. നിലവിലെ ലോക ചാംപ്യനായ ഫ്രാൻസിൻ്റെ അലി റെസ ഫിറൂസ്ജയെ തുടർച്ചയായ രണ്ട് ഗ്രാൻഡ് ഫൈനലുകളിൽ പരാജയപ്പെടുത്തിയാണ് നിഹാൽ കിരീടം സ്വന്തമാക്കിയത്. ഇതോടെ ലോക ബുള്ളറ്റ് ചെസ് ചാംപ്യനാകുന്ന ആദ്യ ഇന്ത്യൻ താരമെന്ന ചരിത്രനേട്ടവും നിഹാൽ സ്വന്തമാക്കി.
കിരീടത്തിലേക്കുള്ള യാത്രയിൽ നിഹാൽ തുടർച്ചയായി 15 മത്സരങ്ങൾ ജയിച്ചാണ് മികവ് തെളിയിച്ചത്. ബുള്ളറ്റ് ചെസിലെ ഏറ്റവും കരുത്തനായ താരങ്ങളിലൊരാളായ ഫിറൂസ്ജയെ തോൽപിച്ച പ്രകടനം ഓൺലൈൻ സ്പീഡ് ചെസ് ചരിത്രത്തിലെ ശ്രദ്ധേയമായ വിജയങ്ങളിലൊന്നായാണ് വിലയിരുത്തപ്പെടുന്നത്. നിഹാലിൻ്റെ കരിയറിലെ ആദ്യ ഗ്രാൻഡ് ഫൈനലും ഇതായിരുന്നു.
ചെസ് ഡോട്ട് കോം സംഘടിപ്പിക്കുന്ന ലോകത്തിലെ ഏറ്റവും ജനപ്രിയമായ സ്പീഡ് ചെസ് ടൂർണമെന്റുകളിലൊന്നാണ് ബുള്ളറ്റ് ചെസ് ചാംപ്യൻഷിപ്പ്. ഓരോ താരത്തിനും ഒരു മിനിറ്റ് മാത്രം അനുവദിക്കുന്ന അതിവേഗ മത്സരരീതിയിലാണ് ടൂർണമെന്റ് നടക്കുന്നത്. നിശ്ചിത സമയപരിധിക്കുള്ളിൽ കൂടുതൽ പോയിന്റ് നേടുന്ന താരമാണ് വിജയിയായി പ്രഖ്യാപിക്കപ്പെടുന്നത്. ഈ കിരീടവിജയത്തോടെ ആഗോള ചെസ് വേദിയിൽ ഇന്ത്യൻ സ്പീഡ് ചെസിൻ്റെ കരുത്ത് ഒരിക്കൽ കൂടി തെളിയിക്കാനായിരിക്കുകയാണ് മലയാളി ഗ്രാൻഡ്‌മാസ്റ്റർ നിഹാൽ സരിൻ.
