നടി അൻസിബ ഹസൻ, നടി ലക്ഷ്മിപ്രിയ, ഭർത്താവ് ജയേഷ്, തൃപ്പൂണിത്തുറ പൊലീസ് സ്റ്റേഷനിലെ എസ്‌ഐ രേഷ്‌മ എന്നിവർക്ക് എതിരെ നിയമനടപടി ആവശ്യപ്പെട്ട് കോടതിയെ സമീപിച്ചു. ഇവർക്കെതിരെ ക്രിമിനൽ കേസ് രജിസ്റ്റർ ചെയ്യാൻ പൊലീസിന് നിർദേശം നൽകണമെന്നാവശ്യപ്പെട്ടാണ് അൻസിബ ഹർജി സമർപ്പിച്ചത്. ഹർജിയിൽ റിപ്പോർട്ട് സമർപ്പിക്കാൻ തൃപ്പൂണിത്തുറ ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി പൊലീസിനോട് ആവശ്യപ്പെട്ടിട്ടുണ്ട്. ഈ മാസം 17നകം റിപ്പോർട്ട് നൽകാനാണ് നിർദേശം.
ഇതിനിടെ, സംഘടനയെ അപകീർത്തിപ്പെടുത്താൻ ശ്രമിച്ചുവെന്നാരോപിച്ച് അഭിനേതാക്കളുടെ സംഘടനയായ ‘അമ്മ’ അൻസിബയ്ക്ക് കാരണം കാണിക്കൽ നോട്ടീസ് നൽകിയിരുന്നു. നിശ്ചിത സമയത്തിനുള്ളിൽ വിശദീകരണം ലഭിച്ചില്ലെങ്കിൽ സംഘടനയിൽ നിന്ന് പുറത്താക്കുമെന്ന മുന്നറിയിപ്പും നോട്ടീസിൽ ഉൾപ്പെടുത്തിയിട്ടുണ്ട്.
ഈ സാഹചര്യത്തിനിടെയാണ് ലക്ഷ്മിപ്രിയ ഉൾപ്പെടെയുള്ളവർക്കെതിരെ കേസെടുക്കണമെന്ന ആവശ്യവുമായി അൻസിബ കോടതിയെ സമീപിച്ചിരിക്കുന്നത്.
