കൊല്ലം കുണ്ടറയില് റെയില്വേ പാളത്തിന് കുറുകെ വച്ച നിലയില് ഇലക്ട്രിക് പോസ്റ്റ്. എഴുകോണ് പൊലീസ് എത്തി പോസ്റ്റ് നീക്കം ചെയ്തു. അട്ടിമറി സാധ്യത അടക്കം സംശയിക്കുന്ന സാഹചര്യത്തില് റെയില്വേ പൊലീസ് അന്വേഷണം ആരംഭിച്ചിട്ടുണ്ട്.
ഇന്ന് പുലര്ച്ചെ രണ്ടുമണിയോടെയാണ് സംഭവം. റെയില്വേ പാളത്തിന് കുറുകെ വച്ച നിലയില് ഇലക്ട്രിക് പോസ്റ്റ് കണ്ട് പ്രദേശവാസിയാണ് പൊലീസിനെ വിവരം അറിയിച്ചത്. ഉടന് തന്നെ എഴുകോണ് പൊലീസ് സ്ഥലത്തെത്തി ഇലക്ട്രിക് പോസ്റ്റ് നീക്കം ചെയ്തു.
പിന്നീട് മണിക്കൂറുകൾക്ക് ശേഷം റെയില്വേ പോലീസ് എത്തി പരിശോധന നടത്തിയപ്പോള് വീണ്ടും പോസ്റ്റ് കണ്ടെത്തുകയായിരുന്നു. ഇതാണ് സംശയം വര്ധിപ്പിക്കുന്നത്. അട്ടിമറിശ്രമത്തിലേക്കുള്ള സാമൂഹിക വിരുദ്ധരുടെ പ്രവൃത്തിയാകാമെന്നാണ് എഴുകോണ് പൊലീസ് പറയുന്നത്.
എന്നാല് അട്ടിമറി സാധ്യത അടക്കം സംശയിക്കുന്ന സാഹചര്യത്തില് പുനലൂര് റെയില്വേ പൊലീസ് ആണ് സംഭവം അന്വേഷിക്കുന്നത്. പാലരുവി എക്സ്പ്രസ് കടന്നുപോകുന്നതിന് തൊട്ടുമുന്പാണ് റെയില്വേ പാളത്തില് ഇലക്ട്രിക് പോസ്റ്റ് കണ്ടെത്തിയത്.
അതിനാല് വന് അപകടം ഒഴിവായി. ഇതിനിടെ സമീപത്തെ ഒരു സിസിടിവി ദൃശ്യം പോലീസിന് ലഭിച്ചിട്ടുണ്ട്. ഈ ദൃശ്യം കേന്ദ്രീകരിച്ചാണ് ഇപ്പോഴത്തെ അന്വേഷണം.
