മസ്തിഷ്ക മരണം സംഭവിച്ചതും വെൻ്റിലേറ്റർ സഹായത്തോടെ കഴിയുന്നതുമായ ഒരു വ്യക്തിയുടെ ബീജം വേർതിരിച്ചെടുക്കാനും ക്രയോപ്രൊസർവ് ചെയ്യാനും കേരള ഹൈക്കോടതി അനുമതി നൽകി. ഭാവിയിൽ ഭർത്താവിൻ്റെതായി ഒരു കുഞ്ഞ് പിറക്കാനുള്ള സാധ്യത കണക്കിലെടുത്ത്, ഭാര്യ കോടതിയെ സമീപിച്ചതിനെ തുടർന്നാണ് ഹൈക്കോടതി അനുമതി.
ചിക്കൻപോക്സ് അണുബാധയെ തുടർന്ന് ഹർജിക്കാരിയുടെ ഭർത്താവിന് സെറിബ്രൽ വെനസ് ത്രോംബോസിസ് ബാധിക്കുകയും, ആശുപത്രിയിൽ വെൻ്റിലേറ്റർ സഹായത്തിലായിരിക്കെ മസ്തിഷ്ക മരണം സംഭവിച്ചതായി പ്രഖ്യാപിച്ചതിനെ തുടർന്നുമാണ് ഹർജി സമർപ്പിച്ചത്.
ജസ്റ്റിസ് എം.ബി. സ്നേഹലതയുടെ ബെഞ്ച് ഇത് അനുവദിക്കുകയും അംഗീകൃത അസിസ്റ്റഡ് റീപ്രൊഡക്റ്റീവ് ടെക്നോളജി (എആർടി) ക്ലിനിക്കിൻ്റെ സേവനം തേടുകയും ചെയ്തു. ഭർത്താവിന് ഈ നടപടിക്രമത്തിന് രേഖാമൂലമുള്ള സമ്മതം നൽകാൻ കഴിയില്ലെന്ന് ഭാര്യ തൻ്റെ ഹർജിയിൽ വാദിച്ചു. ഇനി വൈകിയാല്‍ പിതൃത്വത്തിനുള്ള സാധ്യത എന്നേയ്ക്കുമായി നഷ്ടപ്പെടുമെന്നും അറിയിച്ചു.
തുടര്‍ന്ന് യുവാവിൻ്റെ ബീജം ശേഖരിക്കാനും ശീതീകരിച്ച് സൂക്ഷിക്കാനും (ക്രയോപ്രിസര്‍വേഷന്‍) കോടതി അനുമതി നല്‍കുകയായിരുന്നു. എന്നാല്‍, ഗര്‍ഭധാരണത്തിനടക്കം മറ്റു എആര്‍ടി നടപടികളിലേക്ക് കടക്കണമെങ്കില്‍ കോടതിയുടെ അനുമതി വേണമെന്നും ഉത്തരവില്‍ വ്യക്തമാക്കി. ഏപ്രില്‍ ഏഴിന് കേസ് വീണ്ടും പരിഗണിക്കും.
