ശബരിമല സ്വർണപ്പാളി വിഷയത്തിൽ തുടർച്ചയായി നാലാം ദിവസവും പ്രതിപക്ഷ പ്രതിഷേധം. നിയമസഭയിൽ നാടകീയ രംഗങ്ങളാണ് അരങ്ങേറിയത്. മുഖ്യ മന്ത്രി ഇന്നലെ നടത്തിയ ബോഡി ഷെയ്‌മിംഗ് പരാമർശത്തിലാണ് ഇന്ന് പ്രതിഷേധം.
പ്രതിഷേധത്തിന് തുടക്കമിട്ടത് പ്രതിപക്ഷ നേതാവ് സംസാരിക്കാൻ തുടങ്ങിയപ്പോഴാണ്. ബോഡി ഷെയ്‌മിംഗ് പരാമർശം ഉയർത്തിയ വി.ഡി. സതീശൻ വാച്ച് ആൻഡ് വാർഡർമാരെ വെച്ച് പ്രതിപക്ഷത്തെ നേരിടാൻ സ്‌പീക്കർ ശ്രമിച്ചു വെന്നും ആരോപിച്ചു. പിന്നാലെ പ്രതിപക്ഷ നേതാവും സ്‌പീക്കറും തമ്മിൽ വാക്കുതർക്കമുണ്ടായി.
ഇതോടെ, പ്രതിപക്ഷം ബാനറുമായി നടുത്തളത്തിലേക്കിറങ്ങി. ചെയറിനു മുന്നിൽ നിന്ന് ബാനർ പിടിച്ചു വാങ്ങാൻ സ്‌പീക്കർ വാച്ച് ആൻഡ് വാർഡർമാരോട് പറഞ്ഞതോടെ സഭയിൽ വീണ്ടും പ്രതിഷേധം ശക്തമായി. ബാനറുമായി പ്രതിപക്ഷം വീണ്ടും സ്‌പീക്കറുടെ ഡയസിനു മുന്നിൽ നിന്നുകൊണ്ട് പ്രതിഷേധിക്കുകയായിരുന്നു.
