കെഎസ്ആര്‍ടിസിയുടെ പ്രതിദിന വരുമാനം സര്‍വകാല റെക്കോഡായ 10.19 കോടിയിൽ എത്തി. കെഎസ്ആര്‍ടിസി ഇന്നലെ മാത്രം 10.19 കോടി രൂപയുടെ നേട്ടമാണ് സ്വന്തമാക്കിയത്. ആഗസ്തില്‍ കെഎസ്ആര്‍ടിസിയുടെ ആകെ നഷ്ടത്തില്‍നിന്ന് 10 കോടി രൂപ കുറയ്ക്കാനായി എന്നത് വലിയ വിജയമാണെന്ന് ഗതാഗതമന്ത്രി കെ ബി ഗണേഷ്‌കുമാര്‍ പറഞ്ഞു. കെഎസ്ആര്‍ടിസിയുടെ പ്രതിദിന കളക്ഷന്‍ ആദ്യമായാണ് 10 കോടി കടക്കുന്നതെന്നും അദ്ദേഹം പറഞ്ഞു.
കഴിഞ്ഞ ജൂലൈയില്‍ 60.12 കോടിയായിരുന്നു നഷ്ടമെങ്കില്‍ ഈ വര്‍ഷം അത് 50.2 കോടിയായി ചുരുങ്ങി. ദിവസം ബാങ്ക് കണ്‍സോര്‍ഷ്യത്തിന് 1.19 കോടി നല്‍കണം. 8.40 കോടി രൂപ പ്രതിദിന കലക്ഷന്‍ കിട്ടിയാല്‍ കെഎസ്ആര്‍ടിസി ലാഭത്തിലാകുമെന്നും മന്ത്രി പറഞ്ഞു. സ്ത്രീകളെയും കുടുംബങ്ങളെയും ഉള്‍പ്പെടെ കൂടുതല്‍ യാത്രക്കാരെ ആകര്‍ഷിക്കുക എന്നതാണ് കെഎസ്ആര്‍ടിസിയുടെ ലക്ഷ്യമെന്നും അദ്ദേഹം പറഞ്ഞു.
