അമ്പലപ്പുഴ തോട്ടപ്പള്ളി ഒറ്റപ്പനയിൽ തനിച്ചു താമസിച്ചിരുന്ന സ്ത്രീ കൊല്ലപ്പെട്ട സംഭവത്തിൽ അയൽപക്കത്തു വാടകയ്ക്കു താമസിച്ചിരുന്ന ദമ്പതികൾ പിടിയിൽ. തോട്ടപ്പള്ളി ഒറ്റപ്പനയ്ക്കു സമീപം ചെമ്പകപ്പള്ളി ഹംലത്തിനെ കിടപ്പുമുറിയിൽ കട്ടിലിൽ ചാരിക്കിടക്കുന്ന നിലയിലാണു മൃതദേഹം കണ്ടത്. കഴിഞ്ഞദിവസം ഹംലത്തുമായി അടുപ്പമുണ്ടായിരുന്ന പ്രദേശവാസി അബുബക്കറിനെ പൊലീസ് അറസ്റ്റ് ചെയ്തിരുന്നു. എന്നാൽ യഥാർഥ പ്രതികൾ മുൻ മോഷണക്കേസ് പ്രതിയും ഭാര്യയുമാണെന്ന് ഇന്ന് വ്യക്തമാകുകയായിരുന്നു. ഇരുവരും പിടിയിലായി.
ഇവർ മുൻപ് ഹംലത്തിന്‍റെ അയൽപക്കത്തു വാടകയ്ക്കു താമസിച്ചിരുന്നു. പൊലീസ് ഇവരെ സംബന്ധിച്ചുള്ള മറ്റു വിവരങ്ങൾ പുറത്തുവിട്ടിട്ടില്ല. തനിച്ചു താമസിക്കുകയായിരുന്ന ഹംലത്തിനെ 17 നാണ് വീടിനുള്ളിൽ കൊല്ലപ്പെട്ട നിലയിൽ കണ്ടെത്തിയത്. അബൂബക്കർ സ്ത്രീയുടെ വീട്ടിൽ വന്നിരുന്നെങ്കിലും ഇയാൾ മടങ്ങിയശേഷമാണു കൊലപാതകം നടന്നത്. ശ്വാസംമുട്ടലുണ്ടെന്നു സ്ത്രീ പറഞ്ഞപ്പോൾ അബൂബക്കർ അവിടെയുണ്ടായിരുന്ന ശീതളപാനീയം നൽകി. പിന്നാലെ സ്ത്രീ ഉറങ്ങിയപ്പോൾ രാത്രി 11 മണിയോടെ അബൂബക്കർ മടങ്ങിയിരുന്നു.
മോഷ്‌ടാവും ഭാര്യയും അർധരാത്രിക്കുശേഷം അവിടെയെത്തി. വൈദ്യുതി വിച്ഛേദിച്ചശേഷം അടുക്കള വാതിൽ മൺവെട്ടികൊണ്ടു തട്ടിത്തുറന്ന് അകത്തു കടന്നു. ശ്വാസംമുട്ടലുണ്ടായിരുന്ന ഹംലത്ത് തളർന്നുകിടന്ന് ഉറങ്ങുകയായിരുന്നു. ഹംലത്ത് ശബ്ദം കേട്ട് ബഹളമുണ്ടാക്കിയപ്പോൾ മോഷ്‌ടാവിൻ്റെ ഭാര്യ കാലുകളിൽ ബലമായി പിടിച്ചു. ഭർത്താവ് ശ്വാസംമുട്ടിച്ചു കൊലപ്പെടുത്തി. അലമാരയിലുണ്ടായിരുന്ന കമ്മലും മൊബൈൽ ഫോണും ഇവർ കൈക്കലാക്കി. ഇരുട്ടായതിനാൽ ഹംലത്ത് അണിഞ്ഞിരുന്ന ആഭരണങ്ങൾ പ്രതികൾ കണ്ടില്ല.
സ്ഥലത്തു മുളകുപൊടി വിതറിയശേഷം ഇവർ കടന്നുകളയുകയായിരുന്നു. കേസ് അന്വേഷിച്ച പൊലീസ് ഹംലത്തുമായി അടുപ്പമുണ്ടായിരുന്ന അബുബക്കറിനെ പിടികൂടി. ഇയാൾ കുറ്റം സമ്മതിക്കുകയും ചെയ്തു. ഹംലത്തിന്‍റെ മൊബൈൽ ഫോൺ കണ്ടെത്താൻ കഴിയാത്തതു പൊലീസിനെ വലച്ചിരുന്നു. ഈ ഫോണിൽ മറ്റൊരു സിം കാർഡ് ഉപയോഗിച്ചു പ്രവർത്തിപ്പിക്കുന്നതു പൊലീസ് പിന്നീട് കണ്ടെത്തി. കൊല്ലം മൈനാഗപ്പള്ളിയായിരുന്നു ലൊക്കേഷൻ. പൊലീസ് അവിടെയെത്തി പ്രതികളെ പിടികൂടുകയായിരുന്നു.
