മലയാളി നേഴ്സ് നിമിഷ പ്രിയയുടെ ശിക്ഷ നടപ്പാക്കുന്നത് നീട്ടിവച്ചു എന്ന വിവരം ആശ്വാസജനകവും പ്രതീക്ഷാനിർഭരവുമാണെന്ന് മുഖ്യമന്ത്രി പിണറായി വിജയൻ. ഇതിലൂടെ നിമിഷക്ക് ലഭിച്ചിരിക്കുന്നത് ശിക്ഷാവിധിയിൽ നിന്ന് മുക്തി നേടാനുള്ള കൂടുതൽ സമയമാണ്. ഈ തീരുമാനത്തിലേക്ക് നയിച്ചത് കാന്തപുരം എ.പി.അബൂബ ക്കർ മുസ് ലിയാരുടെ മുൻകൈയും ഇടപെടലും ആണെന്നും അദ്ദേഹം പറഞ്ഞു. സുമനസ്സുകളുടെ മനുഷ്യത്വവും സാഹോദര്യവും തുളുമ്പുന്ന അക്ഷീണ പ്രയത്നത്തിന്‍റെ ഫലമാണ് ഈ തീരുമാനം.
നിമിഷപ്രിയയ്ക്ക് നീതി ലഭിക്കുന്നതിന് വേണ്ടി പരിശ്രമിക്കുന്ന ശ്രീ കാന്തപുരത്തെയും ആക്ഷൻ കൗൺസിൽ ഉൾപ്പെടെയുള്ള എല്ലാവരെയും അഭിനന്ദിക്കുന്നു. എല്ലാവരുടെയും പ്രതീക്ഷയും ശ്രമങ്ങളും എത്രയും വേഗം പൂർണജയത്തിൽ എത്തട്ടെ എന്ന് ആഗ്രഹിക്കുന്നു’. മുഖ്യമന്ത്രി പറഞ്ഞു. കാന്തപുരത്തിന്‍റെ ഇടപെടലാണ് വധശിക്ഷ നീട്ടിവയ്ക്കുന്നതിൽ നിർണായകമായത്. ഇന്നും ഇന്നലെയും കൊല്ലപ്പെട്ട യുവാവിൻ്റെ കുടുംബവും മറ്റു പ്രമുഖരും പങ്കെടുത്ത യോഗം യെമനിൽ ചേർന്നിരുന്നു.
