തമിഴ്നാട് മുൻ മുഖ്യമന്ത്രി എം.കെ.സ്റ്റാലിൻ്റെ സുരക്ഷയിൽ കുറവ് വരുത്തി വിജയ് സർക്കാർ. നിലവിൽ ഇസഡ് പ്ലസ് സുരക്ഷ ലഭിച്ചിരുന്ന സ്റ്റാലിൻ്റെ സുരക്ഷാ കാറ്റഗറി ഇസഡ് വിഭാഗത്തിലേക്ക് താഴ്ത്തി.
സുരക്ഷാ ക്രമീകരണങ്ങളുടെ ഭാഗമായി സ്റ്റാലിന് സുരക്ഷയൊരുക്കിയിരുന്ന പൊലീസുകാരുടെ എണ്ണത്തിലും കുറവ് വരുത്തിയിട്ടുണ്ട്. ചീഫ് സെക്രട്ടറിയുടെയും സംസ്ഥാന പൊലീസ് മേധാവിയുടെയും നേതൃത്വത്തിൽ നടന്ന യോഗത്തിലാണ് സുരക്ഷാ പുനഃക്രമീകരണം സംബന്ധിച്ച് തീരുമാനമെടുത്തത്. സുരക്ഷാ ഭീഷണി വിലയിരുത്തലിൻ്റെ അടിസ്ഥാനത്തിലാണ് സുരക്ഷാ വിഭാഗത്തിൽ മാറ്റം വരുത്തിയതെന്നാണ് റിപ്പോർട്ട്.
അതേസമയം, മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ സ്റ്റാലിൻ്റെ സുരക്ഷ കുറച്ചതിനെതിരെ രാഷ്ട്രീയ വിമർശനങ്ങൾ ഉയരാനുള്ള സാധ്യതയുണ്ട്. സുരക്ഷാ സംവിധാനത്തിലെ മാറ്റത്തിന് പിന്നിലെ മാനദണ്ഡങ്ങളും തീരുമാനത്തിന്റെ വിശദാംശങ്ങളും സംബന്ധിച്ച് കൂടുതൽ വ്യക്തത വരേണ്ടതുണ്ട്.
