ഡൽഹിയിലെ ആക്രമണത്തെ യുഎഇ വിദേശകാര്യ മന്ത്രാലയം ശക്തമായി അപലപിച്ചു, എല്ലാ അക്രമങ്ങളെയും ഭീകരവാദ പ്രവർത്തനങ്ങളെയും തങ്ങൾ നിരസിക്കുന്നുവെന്ന് പ്രസ്താവിച്ചു. സ്ഫോടനത്തിൽ കൊല്ലപ്പെട്ടവർക്ക് സൗദി അറേബ്യയും അനുശോചനം രേഖപ്പെടുത്തുകയും ഇന്ത്യയ്‌ക്ക് പിന്തുണ നൽകുകയും ചെയ്തു.
ഇറാന്‍, ഖത്തർ, മലേഷ്യ എന്നീ രാജ്യങ്ങളും ആക്രമണത്തെ അപലപിക്കുകയും ഇന്ത്യയോട് ഐക്യദാർഢ്യം പ്രഖ്യാപിക്കുകയും ചെയ്തു. സുരക്ഷയും സ്ഥിരതയും തകർക്കാൻ ലക്ഷ്യമിട്ടുള്ള എല്ലാത്തരം അക്രമങ്ങളെയും ഭീകരതയെയും ശാശ്വതമായി നിരസിക്കുന്നതായും ഈ ക്രിമിനൽ പ്രവൃത്തികളെ ശക്തമായി അപലപിക്കുന്നതായും യുഎഇ വിദേശകാര്യ മന്ത്രാലയം പ്രസ്താവനയിൽ പറഞ്ഞു.
ഇന്ത്യൻ സർക്കാരിനും ഇന്ത്യയിലെ ജനങ്ങൾക്കും ഇരകളുടെ കുടുംബങ്ങൾക്കും മന്ത്രാലയം അഗാധമായ അനുശോചനവും സഹതാപവും രേഖപ്പെടുത്തുകയും പരിക്കേറ്റ എല്ലാവരും വേഗത്തിൽ സുഖം പ്രാപിക്കട്ടെയെന്ന് ആശംസിക്കുകയും ചെയ്തു.
