വാളയാറിൽ വെച്ച് 16 കിലോ കഞ്ചാവുമായി രണ്ട് യുവാക്കൾ അറസ്റ്റിലായി. കെഎസ്ആർടിസി ബസ് വഴി കഞ്ചാവ് കടത്താൻ ശ്രമിച്ച രണ്ട് യുവാക്കളെയാണ് വാളയാറിൽ വെച്ച് എക്സൈസ് സംഘം പിടികൂടിയത്. എറണാകുളം സ്വദേശികളായ ജിതിൻ കെ.എസ് (കുമ്പളം), കെനസ് ജോൺ (മൂവാറ്റുപുഴ) എന്നിവരാണ് അറസ്റ്റിലായത്.
കെഎസ്ആർടിസി ബസ് വഴി ഒറീസയിൽ നിന്നും എറണാകുളത്തേക്കാണ് ഇവർ കഞ്ചാവ് എത്തിക്കാൻ ശ്രമിച്ചത്. ബാഗുകളിൽ ഒളിപ്പിച്ച നിലയിലായിരുന്നു കഞ്ചാവ്. പിടിയിലായവർ എറണാകുളത്തെ ലഹരി വിൽപന സംഘത്തിലെ പ്രധാനികളാണെന്ന് എക്സൈസ് ഉദ്യോഗസ്ഥർ അറിയിച്ചു.
പ്രതികളെ കോടതിയിൽ ഹാജരാക്കി റിമാൻഡ് ചെയ്തു. വാളയാർ ചെക്ക് പോസ്റ്റ് വഴി ലഹരി കടത്തുന്നത് തടയാൻ എക്സൈസ് പരിശോധന ശക്തമാക്കിയിരിക്കുകയാണ്. സംസ്ഥാനത്തേക്ക് പുറത്തുനിന്ന് ബസ് വഴിയും ട്രെയിൻ വഴിയും ലഹരിമരുന്നുകൾ വൻതോതിൽ എത്തുന്നതായി റിപ്പോർട്ടുകളുണ്ട്.
